بھارت کی ہٹ دھرمی برقرار، ویمنز ٹیم کا بھی محسن نقوی سے ٹرافی لینے سے انکار

بھارتی ویمنز کرکٹ ٹیم نے ایک بار پھر اسپورٹس مین اسپرٹ کی شدید خلاف ورزی کرتے ہوئے ویمنز ایشیا کپ کے فائنل کو متنازع بنا دیا ہے۔ سری لنکا کے خلاف فائنل میچ میں 72 رنز سے کامیابی حاصل کر کے ریکارڈ آٹھویں بار ٹائٹل اپنے نام کرنے کے باوجود، بھارتی ٹیم نے تقریبِ تقسیمِ انعامات میں ایشین کرکٹ کونسل (ACC) کے صدر محسن نقوی سے ٹرافی وصول کرنے سے صاف انکار کر دیا۔ محسن نقوی بطور اے سی سی صدر تقریب کے مہمانِ خصوصی کے طور پر موجود تھے۔

واضح رہے کہ یہ پہلا موقع نہیں ہے جب بھارتی کرکٹ ٹیم کی جانب سے ایسا رویہ اپنایا گیا ہو۔ اس سے قبل گزشتہ برس بھارتی مینز کرکٹ ٹیم نے بھی اے سی سی کے صدر محسن نقوی کے ہاتھوں ٹرافی لینے سے انکار کیا تھا، جس پر عالمی کرکٹ حلقوں میں شدید تنقید کی گئی تھی۔ فائنل مقابلے کی بات کی جائے تو بھارت نے پہلے بیٹنگ کرتے ہوئے 183 رنز کا ہدف دیا تھا، جس کے تعاقب میں دفاعی چیمپئن سری لنکن ویمنز ٹیم بھارتی بولرز کے سامنے نہ ٹھہر سکی اور پوری ٹیم 111 رنز پر ڈھیر ہو گئی۔