جج پر ’’کالا جادو‘‘ کرنے والی خاتون خود ہی مشکل میں پھنس گئی

اپنے حق میں عدالتی فیصلہ حاصل کرنے کے لیے جج پر کالا جادو کرنے کی کوشش کرنے والی ایک 65 سالہ ضعیف خاتون خود ہی قانون کے شکنجے میں پھنس گئی ہے۔ بھارتی میڈیا رپورٹس کے مطابق، یہ انوکھا واقعہ فرسٹ ایڈیشنل سول کورٹ میں پیش آیا جہاں منجولا نامی خاتون نے زمین کے زیرِ التوا سول تنازع کا فیصلہ اپنے حق میں کرانے کے لیے جج کی کرسی اور ڈائس پر سفید سرسوں کے دانے چھڑک دیے۔ عدالت کے عملے نے کرسی پر مشکوک دانے بکھرے دیکھ کر جب سی سی ٹی وی (CCTV) فوٹیج چیک کی، تو خاتون کو یہ حرکت کرتے ہوئے رنگے ہاتھوں پکڑ لیا گیا۔ کورٹ ایڈمنسٹریٹر کی درخواست پر پولیس نے کارروائی کرتے ہوئے ملزمہ کو گرفتار کر لیا۔ پولیس حکام کے مطابق، خاتون نے تفتیش کے دوران اعتراف کیا ہے کہ اس نے یہ جادو ٹونا اس یقین کے ساتھ کیا تھا کہ اس سے اسے کیس جیتنے میں مدد ملے گی۔ پولیس نے ملزمہ کو عدالت میں پیش کیا، جہاں سے اسے 14 روزہ عدالتی تحویل میں جیل بھیج دیا گیا ہے۔