740 کلومیٹر فی گھنٹہ کی تیز ہوائوں میں خطرناک فوٹوگرافی

بھارت کے سابق نیوی افسر کیپٹن نووتیج سنگھ کی انتہائی بلندی پر خطرناک ہواؤں میں ایریل فوٹوگرافی کرتے ہوئے ایک حیران کن ویڈیو سوشل میڈیا پر وائرل ہوگئی ہے جس نے دنیا بھر کے ناظرین کو حیرت میں ڈال دیا۔

وائرل ویڈیو میں کیپٹن سنگھ کو ایک ہیلی کاپٹر کے کھلے دروازے پر کھڑے دیکھا جا سکتا ہے، جہاں وہ زمین سے تقریباً 10 سے 20 ہزار فٹ کی بلندی پر 740 کلومیٹر فی گھنٹہ کی تیز اور سرد ہواؤں کا مقابلہ کرتے ہوئے تصاویر بنا رہے ہیں۔

ویڈیو میں دیکھا جا سکتا ہے کہ تیز ہواؤں کے شدید جھونکوں کے باعث ان کا چہرہ لرز رہا ہے، گال پیچھے کی طرف دب گئے ہیں جبکہ ہونٹ کپکپا رہے ہیں اور آنکھیں تنگ ہو گئی ہیں۔ اس دوران وہ کیمرہ مضبوطی سے تھامے ہوئے اپنی ذمہ داری نبھا رہے ہیں۔

کیپٹن نووتیج سنگھ نے ویڈیو کے ساتھ اپنے پیغام میں لکھا کہ ہوا صرف چہرے کو چھوتی نہیں بلکہ زور سے ٹکرا کر اسے ہلا دیتی ہے، جس سے جلد لہرانے لگتی ہے، پٹھے مڑ جاتے ہیں اور آنکھیں دھندلا جاتی ہیں۔

ان کے مطابق ہیلی کاپٹر کو جان بوجھ کر بغیر کیبن پریشر کے اڑایا جاتا ہے، جو فوجی مشنز میں ریسکیو آپریشن اور ایریل فوٹوگرافی کے لیے عام طریقہ کار ہے۔ جیسے ہی ہیلی کاپٹر کا دروازہ کھلتا ہے، فوٹوگرافر کو شدید ہوا کے دباؤ کے سامنے خود کو سنبھالنا پڑتا ہے۔

انہوں نے بتایا کہ اگرچہ فوٹوگرافر سیٹ بیلٹ اور رسی کے ذریعے محفوظ ہوتا ہے، تاہم درست زاویے سے تصویر لینے کے لیے اسے صرف چند لمحے ہی ملتے ہیں، جس کے دوران اسے انتہائی احتیاط اور مہارت کا مظاہرہ کرنا پڑتا ہے۔