بینک کی معمولی سی غلطی سے کسان کی بیوی کروڑ پتی بن گئی

بھارتی ریاست اتر پردیش کے ضلع مین پوری میں بینک کی ایک معمولی فنی خرابی نے دیو گنج گاؤں کی ایک غریب کسان کی اہلیہ کو راتوں رات کروڑ پتی بنا دیا، مگر خاتون کی غیر معمولی دیانت داری نے سب کے دل جیت لیے۔ کسان پارس بھن کی اہلیہ ریتا، نوراتری کے موقع پر رقم نکلوانے بینک گئیں، مگر بینک بند ہونے کی وجہ سے انہوں نے قریبی اے ٹی ایم کا رخ کیا۔

جب ریتا نے اے ٹی ایم پر اپنا بیلنس چیک کیا تو وہ دنگ رہ گئیں، ان کے اکاؤنٹ میں 9,99,49,588 روپے (تقریباً 10 کروڑ) موجود تھے۔ اپنی آنکھوں پر یقین نہ آنے پر انہوں نے دوسرے اے ٹی ایم سے بھی تصدیق کی اور ثبوت کے طور پر سکرین کی ویڈیو بنائی جو اب سوشل میڈیا پر تیزی سے وائرل ہو رہی ہے۔ اتنی بڑی رقم دیکھ کر بھی ریتا نے ایک روپیہ بھی استعمال نہیں کیا اور اپنے گھر والوں کو بھی سختی سے منع کر دیا کہ وہ ان فنڈز کو ہاتھ نہ لگائیں۔

بینک آف انڈیا کے مقامی برانچ منیجر رشی کانت پانڈے کا کہنا ہے کہ یہ واقعہ کسی تکنیکی خرابی یا غلط ٹرانزیکشن کا نتیجہ معلوم ہوتا ہے۔ ریتا کے اس اقدام نے انہیں پورے علاقے میں ہیرو بنا دیا ہے، سوشل میڈیا صارفین کا کہنا ہے کہ آج کے دور میں جہاں لوگ معمولی فائدے کے لیے ایمان بیچ دیتے ہیں، وہاں ریتا نے دیانت داری کی ایک عظیم مثال قائم کی ہے۔ بینک حکام نے برانچ کھلتے ہی تحقیقات اور غلطی کی درستی کی یقین دہانی کرائی ہے۔