نیویارک ٹائمز: بھارت کی سیاسی مداخلت نے ٹی 20 ورلڈکپ کو مالی نقصان پہنچایا

نیویارک: امریکی اخبار نیویارک ٹائمز نے ٹی ٹوئنٹی ورلڈکپ 2026 میں بھارت کی اجارہ داری اور سیاسی مداخلت پر مبنی چشم کشا رپورٹ شائع کی ہے۔ رپورٹ کے مطابق بھارت کے کھیل سے متعلق فیصلوں اور آئی سی سی و بی سی سی آئی کے گٹھ جوڑ نے ٹورنامنٹ کو نقصان پہنچایا۔

اخبار نے بتایا کہ جب بنگلہ دیش نے سیکیورٹی وجوہات کی بنا پر بھارت میں کھیلنے سے انکار کیا، تو آئی سی سی نے اسے ٹورنامنٹ سے باہر کر دیا۔ پاکستان نے بنگلہ دیش سے اظہار یکجہتی کرتے ہوئے 15 فروری کو کولمبو میں بھارت کے خلاف میچ کا بائیکاٹ کیا۔ پاکستان کے تمام میچز پہلے ہی سری لنکا میں منتقل کیے جا چکے تھے۔

نیویارک ٹائمز کی رپورٹ میں بتایا گیا کہ پاک بھارت میچ نہ ہونے کی وجہ سے آئی سی سی کو تقریباً 250 ملین ڈالر کا مالی نقصان ہو سکتا ہے، جس میں سے 40 فیصد بھارت کو ملنے والا تھا۔ اس کے علاوہ براڈ کاسٹرز کو تین ارب ڈالر کے نقصانات کا اندیشہ ہے۔ بھارتی میڈیا رائٹس ہولڈر ‘جیو اسٹار’ پہلے ہی اپنے تین ارب ڈالر کے معاہدے پر نظر ثانی کی کوشش کر رہا ہے۔

رپورٹ میں کہا گیا کہ ورلڈ کپ کی شروعات سے قبل ہی آئی سی سی کے بھارت نواز فیصلوں، بنگلہ دیش کو ٹورنامنٹ سے باہر کرنے اور پاکستان کے بائیکاٹ کے اعلان کی وجہ سے یہ ٹورنامنٹ متنازع ہو چکا ہے، اور کھیل کے مالی اور سیاسی اثرات گہرا ہونے کے امکانات ہیں۔