جوڑے نے فوٹو شوٹ کیلئے ہائی وے ہی بلاک کر دیا

بھارت میں ایک جوڑے نے مصروف شاہراہ پر بیٹھ کر فوٹو شوٹ کرتے ہوئے سڑک کا ایک حصہ بلاک کر دیا، جس کے باعث متعدد افراد کی جانیں خطرے میں پڑ گئیں۔ واقعے کی ویڈیو ایک گاڑی کے ڈیش کیم میں محفوظ ہو گئی جو بعد ازاں سوشل میڈیا پر وائرل ہو گئی۔

مبینہ طور پر چلتی گاڑی کے اندر سے ریکارڈ کی گئی ویڈیو میں دیکھا جا سکتا ہے کہ ایک ڈرائیور اس سڑک کی جانب بڑھ رہا ہے جہاں ڈھلوان کے باعث مرئیت محدود ہے۔ جیسے ہی گاڑی قریب پہنچتی ہے تو اچانک ایک جوڑا ہائی وے کے بائیں جانب کھڑی سکوٹر پر بیٹھا نظر آتا ہے۔

ویڈیو کے مطابق سکوٹر سڑک کو جزوی طور پر روک رہا تھا جبکہ جوڑا سیلفی لینے میں مصروف اور آنے والی ٹریفک سے بے خبر دکھائی دیتا ہے۔ ڈرائیور اپنی گاڑی روک کر جوڑے سے سوال کرتا ہے کہ وہ اس خطرناک مقام پر کیا کر رہے ہیں، تاہم جوڑا الٹا ڈرائیور پر اعتراض کرتا ہے اور دعویٰ کرتا ہے کہ انہیں سڑک پر تصاویر بنانے کا پورا حق حاصل ہے۔

یہ ویڈیو اس بات کی واضح مثال ہے کہ لاپرواہی کا ایک لمحہ کس طرح بڑے سانحے کا سبب بن سکتا ہے۔

سوشل میڈیا پر ویڈیو وائرل ہونے کے بعد صارفین کی جانب سے شدید ردعمل سامنے آیا، کئی افراد نے جوڑے کے رویے پر غصے کا اظہار کیا جبکہ دیگر نے ٹریفک قوانین کے سخت نفاذ اور ہائی ویز پر خطرناک رویے اختیار کرنے والوں کے لیے سخت سزاؤں کا مطالبہ کیا۔

کئی صارفین نے نشاندہی کی کہ ہائی ویز مسلسل نقل و حرکت کے لیے بنائی جاتی ہیں اور ایسے مقامات پر چند لمحوں کا رکنا بھی جان لیوا ثابت ہو سکتا ہے۔