راولپنڈی:امن و امان کی موجودہ صورتحال کے پیش نظر اڈیالہ جیل کی سیکیورٹی سخت

امن و امان کی موجودہ صورتحال کے پیش نظر اڈیالہ جیل راولپنڈی کی بیرونی سیکیورٹی کو ہائی الرٹ کر دیا گیا ہے، جبکہ خصوصی سیکیورٹی پلان غیر معینہ مدت تک نافذ العمل رہے گا۔ جیل کے اطراف اور مرکزی راستوں پر مجموعی طور پر 5 اہم مقامات داہگل، جیل گیٹ ون، گیٹ فائیو، فیکٹری ناکہ اور گورکھپورپر پولیس کی بھاری نفری تعینات کر دی گئی ہے۔

پولیس اہلکار 12، 12 گھنٹے کی شفٹوں میں ڈیوٹی انجام دیں گے، جبکہ 12 تھانوں کے ایس ایچ اوز، خواتین پولیس افسران اور اہلکار بھی سیکیورٹی فرائض سر انجام دیں گے۔ آر پی او، پنجاب کانسٹیبلری اور مختلف تھانوں کے عملے سمیت 700 سے زائد اہلکار تعینات ہیں، جو ربڑ بلٹس، آنسو گیس، شیلڈز اور اینٹی رائٹ ساز و سامان سے لیس ہوں گے۔ٹریفک پولیس کے 10 افسران و اہلکار بھی فرائض پر مامور ہوں گے، جبکہ لفٹرز اور قیدی وینز بھی موقع پر موجود رہیں گی۔ سیکیورٹی پلان پر عملدرآمد کی براہِ راست نگرانی ایس پی صدر انعم شیر کریں گی۔گوجرخان، مندرہ، کہوٹہ، کلرسیداں اور دھمیال تھانوں کے ایس ایچ اوز اور نفری تعینات رہیں گے، جبکہ تھانہ چکری، روات، چونترہ، ویمن، مورگاہ، کینٹ اور صدر بیرونی کے ایس ایچ اوز بھی اپنی ٹیموں کے ساتھ ذمہ داریاں نبھائیں گے۔ مجموعی طور پر 23 انسپکٹرز تعینات اہلکاروں کی قیادت کریں گے