پنجاب میں کرپشن کیخلاف بڑا کریک ڈاؤن، 54 افسران و اہلکار معطل اور برطرف، عظمیٰ بخاری

صوبائی وزیرِ اطلاعات عظمیٰ بخاری نے کہا ہے کہ وزیراعلیٰ پنجاب مریم نواز کی ہدایت پر صوبے بھر میں کرپشن کے خلاف بلا تفریق کریک ڈاؤن جاری ہے، جس کے تحت اب تک 54 افسران اور اہلکار معطل یا ملازمتوں سے برطرف کیے جا چکے ہیں۔ لاہور میں میڈیا سے گفتگو کرتے ہوئے ان کا کہنا تھا کہ حکومتِ پنجاب نے تمام سرکاری محکموں سے بدعنوانی کا خاتمہ اپنا مشن بنا رکھا ہے اور اس سلسلے میں صرف محکمہ خوراک میں مالی بے ضابطگیوں پر 48 افسران اور اہلکاروں کو گرفتار کیا گیا ہے۔ اس کے علاوہ 6 ملازمین کو نوکریوں سے برطرف کیا جا چکا ہے جبکہ 14 فوڈ کنٹرولرز کے خلاف سخت تادیبی کارروائی جاری ہے۔

صوبائی وزیر نے عوامی شکایت پر کی جانے والی دیگر کارروائیوں کی تفصیلات بتاتے ہوئے کہا کہ وکٹوریہ ہسپتال بہاولپور کی پارکنگ میں اوور چارجنگ پر متعلقہ ٹھیکیدار کو گرفتار کر لیا گیا ہے، جبکہ ٹی ایچ کیو ہسپتال چیچہ وطنی میں اوور چارجنگ کا ٹھیکہ منسوخ کر دیا گیا ہے۔ عظمیٰ بخاری نے زور دیا کہ کرپشن معاشرے کا ناسور بن چکی ہے اور اس کے خلاف آپریشن کسی سیاسی انتقام یا ٹارگٹ کے بغیر جاری رہے گا۔ انہوں نے مزید کہا کہ مریم نواز خلافِ قانون کاموں اور منفی پروپیگنڈے سے متاثر ہوئے بغیر اپنے عوامی فلاح کے فیصلوں پر سختی سے عمل درآمد کروا رہی ہیں۔