کوئٹہ سے ٹرین سروس 2 روزہ معطلی کے بعد دوبارہ بحال

بلوچستان سے ملک کے دیگر صوبوں کے لیے معطل کی گئی ٹرین سروس دو روز کی عارضی معطلی کے بعد تمام روٹس پر باقاعدہ طور پر بحال کر دی گئی ہے۔ ریلوے انتظامیہ کے مطابق کوئٹہ سے پشاور جانے والی جعفر ایکسپریس اپنے مقررہ وقت پر کوئٹہ ریلوے اسٹیشن سے منزل کی جانب روانہ ہو گئی ہے، جبکہ پشاور سے آنے والی جعفر ایکسپریس بھی اپنے طے شدہ شیڈول کے مطابق آج کوئٹہ پہنچے گی۔

واضح رہے کہ ریلوے انتظامیہ کی جانب سے ریلوے ٹریک کی ضروری مرمت اور بحالی کے کاموں کے سلسلے میں بلوچستان کے لیے تمام ٹرین آپریشنز کو دو دنوں کے لیے معطل کیا گیا تھا۔ مرمتی کام کی بروقت تکمیل کے بعد ریلوے ٹریک کو مسافر ٹرینوں کی آمدورفت کے لیے مکمل طور پر محفوظ قرار دے کر سروسز دوبارہ شروع کر دی گئی ہیں، جس سے مسافروں کو درپیش سفری مشکلات کا خاتمہ ہو گیا ہے۔