علیمہ اور عظمیٰ خان کیخلاف اسلام آباد میں درج مقدمات کی رپورٹ سامنے آگئی

اسلام آباد ہائیکورٹ میں بانی پاکستان تحریک انصاف (پی ٹی آئی) عمران خان کی بہنوں علیمہ خان اور عظمیٰ خان کے خلاف درج مقدمات کی تفصیلات کی فراہمی سے متعلق درخواست پر سماعت کے دوران پولیس اور نیب و ایف آئی اے کی جانب سے جامع رپورٹ جمع کرا دی گئی۔ کیس کی سماعت اسلام آباد ہائیکورٹ کے جسٹس شاہ رخ ارجمند نے کی۔ سماعت کے دوران علیمہ خان کی طرف سے وکلا خالد یوسف چودھری اور شاہینہ شہاب جبکہ وفاقی حکومت کی جانب سے عثمان گھمن عدالت میں پیش ہوئے۔

عدالت عالیہ میں جمع کرائی گئی سرکاری رپورٹ کے مطابق اسلام آباد کے مختلف تھانوں میں علیمہ خان اور عظمیٰ خان کے خلاف کل 3 مقدمات درج ہیں، جبکہ وفاقی تحقیقاتی ادارے (ایف آئی اے) میں دونوں بہنوں کے خلاف ایک انکوائری بھی زیرِ التوا ہے۔ اسٹیٹ کونسل نے عدالت کو بتایا کہ آج کی تاریخ تک کی دستیاب معلومات کے مطابق ان دونوں شخصیات کے خلاف صرف یہی تین مقدمات اور ایک انکوائری موجود ہے۔ عدالت نے سرکاری رپورٹ ریکارڈ کا حصہ بناتے ہوئے درخواست کو باقاعدہ طور پر نمٹا دیا۔ واضح رہے کہ یہ درخواست شاہ ریز خان کی جانب سے اکتوبر 2024ء میں دونوں بہنوں کی گرفتاری کے دوران بیرسٹر سلمان صفدر کی وساطت سے دائر کی گئی تھی۔