لانا نصیبہ یو این سیکرٹری جنرل بننے کی کوشش میں گریٹر اسرائیل منصوبے کو آگے بڑھا رہی ہیں، قالیباف

ایران کی پارلیمنٹ کے اسپیکر محمد باقر قالیباف نے اقوام متحدہ کی اگلی سیکرٹری جنرل بننے کی دوڑ میں شامل متحدہ عرب امارات (UAE) کی سینئر سفارتکار لانا نصیبہ پر شدید تنقید کرتے ہوئے الزام عائد کیا ہے کہ ان کی نامزدگی کا مقصد “گریٹر اسرائیل” منصوبے کو سفارتی سطح پر آگے بڑھانا ہے۔

سوشل میڈیا پلیٹ فارم ایکس (X) پر اپنے ایک بیان میں اسپیکر ایرانی پارلیمنٹ باقر قالیباف نے لانا نصیبہ کی نامزدگی کو اقوام متحدہ کے اعلیٰ ترین منصب پر قبضے کی کوشش قرار دیتے ہوئے کہا کہ اس قدم کا مقصد غزہ میں ہونے والی منظم نسل کشی اور مظالم پر پردہ ڈالنا ہے۔ انہوں نے کہا کہ اماراتی سفارتکار کے پیشہ ورانہ ریکارڈ میں غزہ میں صیہونی مظالم کے دفاع کے سوا کچھ نہیں، اور ان کی نامزدگی بالکل ایسی ہی ہے جیسے “لومڑی مرغیوں کے باڑے کی نگہبان بننے کے لیے درخواست دے رہی ہو”۔

باقر قالیباف نے اپنی پوسٹ کے ساتھ 2024ء کی ایک خبر کا اسکرین شاٹ بھی شیئر کیا، جس میں لانا نصیبہ کو غزہ جنگ کے دوران اسرائیل کے ساتھ امارات کے تعلقات اور معاہدوں کا دفاع کرتے ہوئے دکھایا گیا تھا۔ واضح رہے کہ حال ہی میں متحدہ عرب امارات نے وزارتِ خارجہ میں سیاسی امور کی انڈر سیکرٹری اور اقوام متحدہ میں سابق نمائندہ لانا نصیبہ کو انتونیو گوتریس کے جانشین کے طور پر اقوام متحدہ کے سیکرٹری جنرل کے عہدے کے لیے باضابطہ طور پر نامزد کیا ہے۔