مبینہ سائبر کرائم انکوائری: قومی کرکٹرز امام الحق اور محمد رضوان این سی سی آئی اے کے سامنے پیش نہ ہو سکے

لاہور: پاکستان کے قومی کرکٹرز امام الحق اور محمد رضوان مبینہ سائبر کرائم انکوائری کے سلسلے میں نیشنل سائبر کرائم انویسٹی گیشن ایجنسی (NCCIA) کی جانب سے طلب کیے جانے کے باوجود اپنے مقررہ وقت پر پیش ہونے میں ناکام رہے ہیں۔

ذرائع کے مطابق این سی سی آئی اے نے دونوں کھلاڑیوں کو اپنا باقاعدہ بیان ریکارڈ کرانے کے لیے اپنے وفاقی کالونی لاہور میں واقع دفتر میں طلب کر رکھا تھا۔ تاہم دونوں قومی کرکٹرز کی جانب سے عدم پیشی سامنے آئی ہے۔

تفتشی ذرائع کا بتانا ہے کہ اس انکوائری کے سلسلے میں این سی سی آئی اے نے اوپنر امام الحق اور وکٹ کیپر بیٹر محمد رضوان کے اسمارٹ فونز پہلے ہی اپنی تحویل میں لے رکھے ہیں، جنہیں ڈیجیٹل اور تکنیکی جانچ کے لیے فرانزک لیبارٹری بھیج دیا گیا ہے۔

تفصیلات کے مطابق، امام الحق کے خلاف ٹیم میں شمولیت اور میچز سے متعلق مبینہ ”فیک انجری“ (جعلی زخمی ہونے) کا الزام زیرِ تفتیش ہے، جبکہ محمد رضوان سے قومی ٹیم کے ڈریسنگ روم کی حساس اور اندرونی معلومات باہر لیک کرنے (ڈریسنگ روم لیکس) کے حوالے سے تحقیقات کا سلسلہ جاری ہے۔