مبینہ جعلی انجری اور ڈسپلن کی خلاف ورزی: ٹیسٹ اوپنر امام الحق کے خلاف ابتدائی رپورٹ تیار

لاہور: پاکستان کرکٹ بورڈ (پی سی بی) کے ذرائع کے مطابق ٹیسٹ اوپنر امام الحق کے خلاف مبینہ مشکوک انجری، ڈریسنگ روم کی معلومات لیک کرنے اور نظم و ضبط کی شدید خلاف ورزیوں پر ابتدائی تفتیشی رپورٹ تیار کر لی گئی ہے، جس کے بعد ان پر دو سال کی پابندی عائد کیے جانے کا امکان ہے۔

ذرائع کا کہنا ہے کہ امام الحق کے ماضی کے ریکارڈر اور پرانی فائلوں کو بھی دوبارہ کھول دیا گیا ہے۔ بورڈ حکام کو انگلینڈ کے اہم دورے سے قبل دورہ نیوزی لینڈ کے دوران امام الحق کی انجری پر شدید شکوک و شبہات تھے۔

اطلاعات کے مطابق گزشتہ انجری کی مکمل انکوائری کے بعد بورڈ کی متعلقہ کمیٹی نے اس وقت بھی قومی اوپنر پر 2 سال کی پابندی عائد کرنے کی سفارش کی تھی۔ تاہم، اس موقع پر ایک سابق ہیڈ کوچ اور سابق چیف سلیکٹر نے بورڈ کے اعلیٰ حکام سے ذاتی ملاقاتیں کر کے امام الحق پر پابندی نہ لگانے کی التجا کی تھی۔ ذرائع نے مزید انکشاف کیا کہ قومی ٹیم کے ایک سابق کپتان نے بھی اپنے اثر و رسوخ کا استعمال کرتے ہوئے امام الحق کو سزا سے بچانے میں اہم کردار ادا کیا تھا۔

ذرائع کے مطابق اس وقت امام الحق کو مبینہ طور پر فرضی انجریز کا بہانہ بنانے، ڈریسنگ روم کی اندرونی گفتگو اور حکمت عملی باہر لیک کرنے اور ڈسپلن کی سنگین خلاف ورزیوں کے الزامات کا سامنا ہے، جس کے بعد بورڈ کی جانب سے ان کے خلاف سخت قانونی و ڈسپلنری کارروائی کا قوی امکان ظاہر کیا جا رہا ہے۔