عدالت نے نیشنل ہائی وے اتھارٹی کو شہریوں سے اضافی ٹول ٹیکس لینے سے روک دیا

اسلام آباد ہائیکورٹ نے نیشنل ہائی وے اتھارٹی (NHA) کی جانب سے موٹر ویز پر شہریوں سے وصول کیے جانے والے اضافی ٹول ٹیکس کے خلاف بڑا حکم جاری کرتے ہوئے اس پر فوری روک لگا دی ہے۔

عدالتِ عالیہ کے معزز جج جسٹس ارباب محمد طاہر نے معاملے پر دائر درخواست کی سماعت کی۔ سماعت کے دوران اسلام آباد ہائیکورٹ نے نان ایم ٹیگ (Non-M-Tag) گاڑیوں اور کم بیلنس والے ایم ٹیگ ہولڈرز پر 50 فیصد اضافی ٹول ٹیکس وصول کرنے سے متعلق این ایچ اے کا جاری کردہ نوٹیفکیشن آئندہ سماعت تک معطل کرتے ہوئے حکمِ امتناع (Stay Order) جاری کر دیا۔

کیس کی سماعت کے دوران درخواست گزار کی جانب سے ایڈووکیٹ محمد جلال حیدر نے دلائل پیش کیے۔ عدالت نے نوٹیفکیشن معطل کرتے ہوئے نیشنل ہائی وے اتھارٹی سمیت کیس کے دیگر فریقین کو باقاعدہ نوٹسز جاری کر دیے ہیں اور ان سے اگلی سماعت پر تفصیلی جواب طلب کر لیا ہے۔

اسلام آباد ہائیکورٹ کے اس حکم کے بعد اب موٹر ویز پر نان ایم ٹیگ یا کم بیلنس کی بنیاد پر شہریوں سے کوئی بھی اضافی ٹیکس یا جرمانہ وصول نہیں کیا جا سکے گا۔ عدالت نے کیس کی مزید تفصیلی سماعت 3 اگست تک کے لیے ملتوی کر دی ہے۔