اسلام آباد ہائی کورٹ کا بڑا اقدام؛ شیشہ کیفوں کے باعث ایچ آئی وی کے پھیلاؤ پر تشویش

اسلام آباد ہائی کورٹ نے وفاقی دارالحکومت میں شیشہ کیفوں کے غیر قانونی کام کرنے اور ایچ آئی وی (HIV) کے مریضوں کی تعداد میں اضافے کے سنگین معاملے پر ڈپٹی کمشنر (DC) اور آئی جی اسلام آباد کی طلبی کا تحریری حکم جاری کر دیا ہے۔ چیف جسٹس سرفراز ڈوگر کی جانب سے جاری کردہ 2 صفحات پر مشتمل سماعت کے حکمنامے میں کہا گیا ہے کہ اسلام آباد کی حدود میں کثیر تعداد میں شیشہ کیفے کام کر رہے ہیں، جن میں سے کئی این او سی (NOC) کے ساتھ اور متعدد بغیر کسی اجازت نامے کے چلائے جا رہے ہیں۔ درخواست گزار کے وکیل کے مطابق، یہ شیشہ کیفے ایچ آئی وی سمیت دیگر موذی بیماریوں کے پھیلاؤ کا بڑا سبب بن رہے ہیں اور متعلقہ فریقین قواعد و ضوابط کی خلاف ورزی کرنے والے ان کیفوں کے خلاف کارروائی کرنے میں مکمل ناکام رہے ہیں۔ عدالت نے چیف کمشنر، ڈپٹی کمشنر، آئی جی اور دیگر فریقین کو ہدایت کی ہے کہ وہ 7 روز کے اندر اپنی رپورٹ اور پیرا وائز کمنٹس عدالت میں جمع کرائیں، جبکہ ڈپٹی کمشنر اور آئی جی پولیس اسلام آباد کو آئندہ سماعت پر ذاتی حیثیت میں پیش ہونے کا حکم دیا ہے۔ کیس کی آئندہ سماعت 9 ستمبر کے لیے مقرر کی گئی ہے۔