قومی کرکٹرز کی تنخواہوں اور مراعات کی تفصیلات جاری کرنے کا حکم معطل

اسلام آباد ہائیکورٹ نے قومی کرکٹ ٹیم کے تمام فارمیٹس کے کھلاڑیوں کے سینٹرل کنٹریکٹس، میچ فیس، الاؤنسز، اور پی سی بی بجٹ سے متعلق معلومات کی فراہمی سے متعلق پاکستان انفارمیشن کمیشن کا 09 جولائی کا فیصلہ معطل کر دیا ہے۔ چیف جسٹس سردار محمد سرفراز ڈوگر نے پی سی بی کی درخواست پر سماعت کرتے ہوئے انفارمیشن کمیشن کے حکم پر امتناعی حکم جاری کر دیا اور کیس میں انفارمیشن کمیشن اور شہری کاشف شہزاد اعوان کو نوٹسز جاری کرتے ہوئے جواب طلب کر لیا۔ سماعت کے دوران پی سی بی کے وکیل کاشف ملک ایڈووکیٹ نے موقف اختیار کیا کہ مانگی گئی معلومات صرف ادارہ جاتی اخراجات تک محدود نہیں بلکہ اس میں انفرادی کھلاڑیوں کی ذاتی مالی تفاصیل اور خفیہ معاہدے شامل ہیں۔ عدالت نے انفارمیشن کمیشن کے فیصلے پر عملدرآمد روکتے ہوئے سماعت ملتوی کر دی۔