قومی ویمن کرکٹرسدرہ امین آئی سی سی بیٹنگ رینکنگ میں ٹاپ 10 میں شامل

انٹرنیشنل کرکٹ کونسل (آئی سی سی) کی جانب سے جاری کردہ تازه‌ ترین ویمنز ون ڈے رینکنگ میں پاکستان اور سری لنکا کی خواتین کرکٹرز نے شاندار کارکردگی کی بدولت نمایاں پیش رفت کی ہے۔ پاکستان اور سری لنکا کے درمیان جاری سیریز کی ابتدائی دو اننگز میں 57 اور 100 رنز کی شاندار اور نا قابلِ شکست اننگز کھیلنے کے بعد پاکستان کی سینئر بیٹر سدرہ امین نویں نمبر پر پہنچ گئی ہیں۔ سدرہ امین نے بھارتی کپتان ہرمن پریت کور کو پیچھے چھوڑتے ہوئے دوبارہ ٹاپ ٹین بیٹرز کی فہرست میں اپنی جگہ مضبوط کر لی ہے۔

پاکستان کی ابھرتی ہوئی اوپننگ بیٹر گل فیروزہ نے 18 درجے چھلانگ لگا کر 54ویں پوزیشن حاصل کی، جبکہ دوسری جانب سری لنکا کی وشمی گنارتنے میچ وننگ سنچری کی بدولت 16 درجے ترقی کے ساتھ اپنے کیریئر کی بہترین 39ویں پوزیشن پر پہنچ گئی ہیں۔ سری لنکن بیٹر ہریتھا سماراوکرما بھی 3 درجے بہتری کے بعد مشترکہ طور پر کیریئر کی بہترین 17ویں پوزیشن حاصل کرنے میں کامیاب رہی ہیں۔

باؤلنگ اور آل راؤنڈرز کی درجہ بندی میں بھی اہم تبدیلیاں دیکھنے میں آئی ہیں۔ سری لنکن کپتان چماری اتھاپتھو باؤلرز کی فہرست میں 32ویں نمبر پر آ گئی ہیں جبکہ وہ آل راؤنڈرز کی رینکنگ میں 8ویں پوزیشن پر براجمان ہیں۔ پاکستان کی اسپنرز اُمِ ہانی اور سیدہ عروب شاہ نے بھی بہترین باؤلنگ کی بدولت بالترتیب 11،11 درجے ترقی کی اور ون ڈے باؤلنگ رینکنگ میں 53ویں اور 63ویں نمبر پر آ گئی ہیں۔