بھارت کیخلاف میچ کے بعد پاکستان ویمن ٹیم پر جرمانہ عائد، آئی سی سی

آئی سی سی ویمنز ٹی ٹوئنٹی ورلڈ کپ 2026 کے پہلے ہی میچ کے بعد انٹرنیشنل کرکٹ کونسل (آئی سی سی) کی جانب سے پاکستان ویمن کرکٹ ٹیم پر بھاری جرمانہ عائد کر دیا گیا ہے۔

آئی سی سی کی طرف سے جاری کردہ آفیشل بیان کے مطابق، ویمنز ٹی ٹوئنٹی ورلڈ کپ کے انتہائی اہم معرکے میں روایتی حریف بھارت کے خلاف میچ کے دوران سلو اوور ریٹ (مقررہ وقت میں اوورز پورے نہ کرنے) پر پاکستان ویمن ٹیم کے خلاف یہ تادیبی کارروائی کی گئی ہے۔ کرکٹ کی عالمی باڈی نے سزا کا اعلان کرتے ہوئے بتایا کہ سلو اوور ریٹ کی پاداش میں پاکستان ٹیم پر میچ فیس کا 5 فیصد جرمانہ عائد کیا گیا ہے۔

آئی سی سی کا کہنا ہے کہ برمنگھم کے تاریخی میدان ایجبسٹن میں کھیلے گئے اس ہائی وولٹیج میچ میں پاکستان ویمن ٹیم مقررہ وقت کے اندر اپنا ایک اوور پیچھے رہی، جس کے باعث قانون کے مطابق یہ ایکشن لیا گیا۔ میچ کے بعد قومی ٹیم کی کپتان فاطمہ ثناء نے میچ ریفری کے سامنے اپنی ٹیم کی اس غلطی کا باقاعدہ اعتراف کیا اور آئی سی سی کی جانب سے تجویز کردہ سزا کو فوری طور پر قبول کر لیا، جس کی وجہ سے اس معاملے پر باقاعدہ سماعت کی ضرورت پیش نہیں آئی۔

یاد رہے کہ ٹی ٹوئنٹی ورلڈ کپ 2026 کے اس سنسنی خیز افتتاحی میچ میں قومی ویمن ٹیم کو سخت مقابلے کے بعد روایتی حریف بھارتی ویمن ٹیم کے ہاتھوں شکست کا سامنا کرنا پڑا تھا۔