ویمنز ایشیا کپ: کپتان فاطمہ ثناء پر آئی سی سی نے جرمانہ عائد کردیا

انٹرنیشنل کرکٹ کونسل (آئی سی سی) نے پاکستان ویمن کرکٹ ٹیم کی کپتان فاطمہ ثناء پر کوڈ آف کنڈکٹ کی خلاف ورزی پر میچ فیس کا 10 فیصد جرمانہ عائد کر دیا ہے۔ یہ اقدام ویمنز ایشیا کپ کے دوران بھارت کے خلاف میچ میں بھارتی بیٹر شفالی ورما کو آؤٹ کرنے کے بعد پویلین کی جانب اشارہ کرنے پر اٹھایا گیا، جسے آئی سی سی کے ضابطہ اخلاق کے تحت لیول-1 کی خلاف ورزی قرار دیا گیا۔ جرمانے کے ساتھ ساتھ فاطمہ ثناء کے کھاتے میں ایک ڈی میرٹ پوائنٹ بھی شامل کر دیا گیا ہے۔

آئی سی سی کے مطابق پاکستانی کپتان نے اپنی غلطی کا اعتراف کر لیا ہے جس کی وجہ سے معاملے پر باقاعدہ سماعت کی ضرورت پیش نہیں آئی۔ اس نئے ڈی میرٹ پوائنٹ کے بعد گزشتہ 24 ماہ کے دوران فاطمہ ثناء کے کل ڈی میرٹ پوائنٹس کی تعداد 2 ہو گئی ہے؛ اس سے قبل انہیں 6 اگست 2025ء کو آئرلینڈ کے خلاف ٹی ٹوئنٹی میچ میں پہلا ڈی میرٹ پوائنٹ ملا تھا۔ واضح رہے کہ بھارت کے خلاف میچ میں پاکستان کی پوری ٹیم 55 رنز پر ڈھیر ہو گئی تھی اور بھارت نے ہدف 3 وکٹوں پر حاصل کر لیا تھا، تاہم قومی ٹیم کے پاس آج ہانگ کانگ کے خلاف فتح حاصل کر کے سیمی فائنل میں پہنچنے کا موقع اب بھی موجود ہے۔