ٹِک ٹاک پر بے وفائی کرتے پکڑے جانیوالے شوہر نے ریسٹورنٹ پر مقدمہ کردیا

ریسٹورنٹ کی جانب سے جاری کی گئی ایک پروموشنل ویڈیو ایک شادی شدہ شخص کے لیے قانونی اور خاندانی بحران کا سبب بن گئی۔ غیر ملکی میڈیا کے مطابق ویڈیو میں ایک 42 سالہ شادی شدہ شخص کو کسی اور خاتون کے ساتھ ڈنر کرتے ہوئے دکھایا گیا، جسے اس کی اہلیہ نے دیکھ لیا اور بطور ثبوت استعمال کرتے ہوئے شوہر سے علیحدگی اختیار کر لی۔

رپورٹس کے مطابق شوہر نے اپنی اہلیہ کو بتایا تھا کہ وہ دفتر کے ساتھیوں کے ساتھ ڈنر پر جا رہا ہے، تاہم ریسٹورنٹ کی سوشل میڈیا ویڈیو میں اسے ایک اور خاتون کے ساتھ دیکھ کر اہلیہ کو بے وفائی کا علم ہوا۔ اس واقعے کے بعد خاتون نے شوہر کو گھر سے نکال دیا اور ازدواجی رشتہ ختم کرنے کا فیصلہ کیا۔

بعد ازاں متاثرہ شوہر نے ریسٹورنٹ کے خلاف عدالت سے رجوع کرتے ہوئے مؤقف اختیار کیا کہ ویڈیو بنا کر اور بغیر اجازت سوشل میڈیا پر شیئر کر کے اس کی پرائیوسی کی خلاف ورزی کی گئی ہے۔ شوہر نے دعویٰ کیا کہ اس ویڈیو کے باعث نہ صرف اس کی ذاتی زندگی متاثر ہوئی بلکہ اسے سماجی بدنامی کا بھی سامنا کرنا پڑا۔

تاحال یہ واضح نہیں ہو سکا کہ ویڈیو اہلیہ کے سامنے خود سامنے آئی یا کسی تیسرے شخص نے شوہر کو پہچان کر ویڈیو اسے بھیجی، تاہم یہ واقعہ سوشل میڈیا، پرائیویسی اور ذاتی زندگی کے تحفظ سے متعلق ایک اہم قانونی بحث کو جنم دے رہا ہے۔