کتوں اور انسان کا تعلق کتنا پرانا ہے؟ سائنسدان جاننے میں کامیاب

کتے کو انسان کا بہترین اور مخلص دوست مانا جاتا ہے، لیکن یہ رشتہ کتنا قدیم ہے؟ سائنسدانوں نے پہلی بار جینیاتی شواہد کی بنیاد پر اس قدیم تعلق کی اصل عمر معلوم کر لی ہے۔ جرمنی کی Ludwig Maximilian یونیورسٹی کی دو حالیہ تحقیقی رپورٹوں کے مطابق، انسانوں اور کتوں کے درمیان تعلق کم از کم 15 ہزار سال پرانا ہے۔

تحقیق کے حیرت انگیز انکشافات:
مشہور سائنسی جریدے ’نیچر‘ (Nature) میں شائع ہونے والی اس تحقیق میں قدیم ڈی این اے (DNA) کے تجزیے سے معلوم ہوا ہے کہ زمانہ قدیم کے شکاری نہ صرف کتوں کو کھانا دیتے تھے بلکہ انہیں اپنے ساتھ دفن بھی کرتے تھے۔

قدیم ترین باقیات: ماہرین کو ترکیہ سے ایک 15,800 سال پرانے کتے کی باقیات ملی ہیں جسے انسان کے ساتھ دفن کیا گیا تھا۔ اسی طرح برطانیہ سے ایک کتے کا جبڑا دریافت ہوا ہے جو 14,300 سال پرانا ہے۔

پہلا پالتو جانور: نتائج سے واضح ہوتا ہے کہ 15 ہزار سال قبل، جب انسان نے کسی دوسرے جانور کو پالتو نہیں بنایا تھا، کتے اس کے ساتھی بن چکے تھے۔ اس سے قبل یہ خیال کیا جاتا تھا کہ یہ سلسلہ 12 ہزار سال پہلے شروع ہوا، مگر نئے جینیاتی شواہد نے اس تاریخ کو مزید پیچھے دھکیل دیا ہے۔

قدیم کتے کیسے تھے؟
تحقیق کے مطابق اس عہد کے کتے موجودہ دور کے کتوں سے مختلف اور کسی چھوٹے بھیڑیے کی طرح نظر آتے تھے۔ ان کے جبڑے آج کے کتوں کے مقابلے میں کم طاقتور تھے۔ ماہرین کا کہنا ہے کہ 14 ہزار سال پہلے تک یورپ اور مغربی ایشیا میں کتے عام ہو چکے تھے اور وہ وہی غذا (جیسے مچھلی) کھاتے تھے جو اس وقت کے انسانوں کا خوراک تھی۔

یہ مطالعہ ثابت کرتا ہے کہ انسان اور کتے کا ساتھ محض ضرورت کا نہیں بلکہ ہزاروں سال پرانے جذباتی اور باہمی تعاون کے رشتے پر مبنی ہے، جو برفانی عہد کے اختتام سے بھی پہلے پروان چڑھ چکا تھا۔