دنیا کا سب سے لمبا زندہ گھوڑا، برطانیہ کے ’ہیوگو‘ نے ریکارڈ قائم کر دیا

برطانیہ میں موجود غیر معمولی جسامت کے مالک ‘ہیوگو’ (Hugo) نامی گھوڑے نے دنیا کے سب سے لمبے زندہ گھوڑے کا باضابطہ گنیز ورلڈ ریکارڈ اپنے نام کر لیا ہے۔ گنیز ورلڈ ریکارڈز کے مطابق شائر (Shire) نسل سے تعلق رکھنے والے ہیوگو کا قد کھروں سے گردن کے نچلے حصے (Withers) تک 199 سینٹی میٹر (تقریباً 6 فٹ 6 انچ یا 19.2 ہینڈز) ریکارڈ کیا گیا ہے، جبکہ اس کا کل وزن تقریباً 890 کلوگرام ہے۔ ہیوگو کے مالکان بریٹ اور لیزا ماسٹرز کا کہنا ہے کہ اس کی نشوونما ابھی جاری ہے اور 7 سے 8 سال کی عمر تک اس کے قد میں مزید اضافے کا امکان ہے، جس سے اس کا اپنا ہی ریکارڈ مزید بڑھ سکتا ہے۔

برطانیہ کے علاقے ٹاؤسیسٹر میں مقیم ہیوگو اپنی غیر معمولی جثے کے باعث مقامی سطح پر پہلے ہی توجہ کا مرکز تھا اور لوگ اکثر اسے دیکھنے اور ویڈیوز بنانے کے لیے رک جاتے تھے۔ مالکان کا کہنا ہے کہ اتنی بڑی جسامت اور طاقت کے باوجود ہیوگو انتہائی نرم مزاج ہے اور اس کا رویہ کسی پالتو کتے کی طرح دوستانہ ہے۔ واضح رہے کہ شائر نسل کے گھوڑے تاریخی طور پر بھاری سامان کھینچنے اور کھیتی باڑی کے لیے استعمال ہوتے رہے ہیں۔ اگرچہ ہیوگو اس وقت دنیا کا سب سے لمبا ‘زندہ’ گھوڑا ہے، تاہم تاریخ کے سب سے لمبے گھوڑے کا ریکارڈ 1850ء میں ‘سیمپسن’ نامی شائر گھوڑے کے پاس تھا جس کا قد 2.19 میٹر (تقریباً 7 فٹ 2.5 انچ) تھا