مکھیوں کے جھنڈ نے طیارہ روک لیا، پرواز تاخیر کا شکار

امریکہ کے شارلٹ ڈگلس انٹرنیشنل ایئرپورٹ پر اس وقت ایک غیر معمولی صورتحال پیدا ہوگئی جب شہد کی مکھیوں کے ایک بڑے جھنڈ نے طیارے کی روانگی میں رکاوٹ ڈال دی۔ غیر ملکی خبر رساں ادارے کے مطابق، پرواز کے لیے تیار کھڑے طیارے کے انجن (ٹربائن) میں اچانک ہزاروں شہد کی مکھیاں داخل ہو گئیں، جس کے باعث حفاظتی خدشات کے پیشِ نظر فلائٹ آپریشن فوری طور پر روک دیا گیا۔

طیارے میں موجود ایک مسافر کی جانب سے شیئر کی گئی ویڈیو میں دیکھا جا سکتا ہے کہ ایئرلائن عملے کے ساتھ مکھیوں کے ماہرین (بی کیپرز) بڑی احتیاط سے انہیں ہٹانے میں مصروف ہیں۔ ریسکیو ٹیم نے ماحول دوست طریقہ کار اپناتے ہوئے مکھیوں کو کسی نقصان کے بغیر ایک خاص ڈبے میں جمع کیا اور انہیں محفوظ مقام پر منتقل کر دیا۔ اس عجیب و غریب واقعے کے باعث طیارہ تقریباً ایک گھنٹے تک تاخیر کا شکار رہا، تاہم تکنیکی معائنے اور تمام حفاظتی انتظامات مکمل کرنے کے بعد پرواز کو منزل کی جانب روانہ کر دیا گیا۔