ایچ بی ایل پی ایس ایل میں ‘پنک ڈے’ کا انعقاد؛ کرکٹ کے میدان سے بریسٹ کینسر سے آگاہی کا پیغام

کراچی: ایچ بی ایل پی ایس ایل 2026 کے رنگ آج گلابی رنگ میں رنگ جائیں گے کیونکہ نیشنل بینک اسٹیڈیم میں بریسٹ کینسر (سرطانِ پستان) سے آگاہی کے لیے خصوصی ‘پنک ڈے’ منایا جا رہا ہے۔ یہ مہم پاکستان کے پہلے بریسٹ کینسر چیریٹی ہسپتال ‘پنک ربن’ کے تعاون سے منعقد کی جا رہی ہے۔ آج ٹورنامنٹ کا چھٹا ڈبل ہیڈر کھیلا جائے گا، جس کے پہلے میچ میں حیدرآباد کنگز مین اور راولپنڈیز آمنے سامنے ہوں گے، جبکہ دوسرے بڑے مقابلے میں کراچی کنگز اور اسلام آباد یونائیٹڈ کی ٹیمیں مدمقابل ہوں گی۔

اس خصوصی دن کی مناسبت سے تمام کھلاڑی اور آفیشلز پنک کیپس اور پنک ربنز پہن کر میدان میں اتریں گے۔ آگاہی مہم کو نمایاں کرنے کے لیے میچ میں استعمال ہونے والے اسٹمپس اور تمام براڈکاسٹ گرافکس کو بھی خصوصی طور پر گلابی رنگ دیا گیا ہے۔ پاکستان میں کینسر کے کل کیسز میں سب سے زیادہ شرح بریسٹ کینسر کی ہے، اسی لیے اس مہم کا بنیادی مقصد بیماری کی بروقت تشخیص کے لیے جلد چیک اپ کی اہمیت کو اجاگر کرنا اور متاثرہ خواتین کو ثابت قدمی سے لڑنے کا حوصلہ دینا ہے۔طبی ماہرین کا کہنا ہے کہ کرکٹ جیسے بڑے پلیٹ فارم سے اس طرح کے پیغامات لاکھوں گھرانوں تک پہنچتے ہیں، جس سے نہ صرف اس بیماری سے جڑے سماجی خوف کا خاتمہ ہوتا ہے بلکہ خواتین کو اپنی صحت کے حوالے سے زیادہ باشعور بنانے میں مدد ملتی ہے۔ آج کا دن محض کھیل نہیں بلکہ ایک انسانی مقصد کے لیے متحد ہونے کا دن ہے۔