پاکستان کرکٹ کا بڑا نام، لٹل ماسٹر حنیف محمد کو دنیا چھوڑے 10 برس بیت گئے

پاکستان کرکٹ کی تاریخ کے عظیم ترین بلے باز، سابق کپتان اور ‘لٹل ماسٹر’ کے نام سے معروف حنیف محمد کی 10 ویں برسی آج عقیدت و احترام کے ساتھ منائی جا رہی ہے۔

21 دسمبر 1934ء کو جونا گڑھ (متحدہ ہندوستان) میں پیدا ہونے والے حنیف محمد کا تعلق ایک مکمل کرکٹنگ فیملی سے تھا۔ ان کے بھائیوں وزیر محمد، رئیس محمد، مشتاق محمد اور صادق محمد نے بھی عالمی سطح پر پاکستان کی نمائندگی کی، جبکہ ان کی والدہ امیر بی بی خود بھی متحدہ ہندوستان کی بیڈمنٹن چیمپئن رہ چکی تھیں۔

حنیف محمد نے 1952ء میں بھارت کے خلاف اپنے بین الاقوامی ٹیسٹ کیریئر کا آغاز کیا۔ انہوں نے پاکستان کی طرف سے 55 ٹیسٹ میچز کی 97 اننگز میں 43.98 کی اوسط سے 3 ہزار 915 رنز بنائے، جن میں 12 سنچریاں اور 15 نصف سنچریاں شامل ہیں۔ حنیف محمد کو پاکستان کی جانب سے ٹیسٹ کرکٹ میں پہلی ٹرپل سنچری بنانے کا تاریخی اعزاز حاصل ہے اور انہیں کھیل کے شعبے میں گراں قدر خدمات پر حکومتِ پاکستان نے صدارتی تمغہ حسنِ کارکردگی (Pride of Performance) سے بھی نوازا۔

ان کا سب سے تاریخی کارنامہ جنوری 1958ء میں ویسٹ انڈیز کے خلاف برج ٹاؤن (بارباڈوس) ٹیسٹ میں سامنے آیا۔ ویسٹ انڈیز کے 579 رنز کے جواب میں قومی ٹیم 106 رنز پر ڈھیر ہو کر فالو آن کا شکار ہو گئی تھی۔ حنیف محمد نے بے مثال صبر اور تکنیک کا مظاہرہ کرتے ہوئے 970 منٹ (تقریباً 16 گھنٹے) تک کریز پر چٹان کی طرح جم کر 337 رنز کی تاریخی اننگز کھیلی اور ٹیم کو یقینی شکست سے بچایا۔ یہ ٹیسٹ کرکٹ کی تاریخ میں سب سے طویل اننگز کا ورلڈ ریکارڈ بھی ہے۔

علاوہ ازیں، 1959ء میں کراچی کی نمائندگی کرتے ہوئے بہاولپور کے خلاف انہوں نے فرسٹ کلاس کرکٹ میں 499 رنز بنا کر سر ڈان بریڈمین کا ریکارڈ توڑا، جو کہ 1994ء میں برائن لارا کے 501 رنز بنانے تک قائم رہا۔

حنیف محمد 11 اگست 2016ء کو طویل علالت کے بعد کراچی میں خالقِ حقیقی سے جا ملے۔ ان کی کرکٹ سروسز کو سراہتے ہوئے آئی سی سی (ICC) نے انہیں ‘ہال آف فیم’ میں شامل کیا جبکہ سرچ انجن گوگل نے بھی ڈوڈل کے ذریعے انہیں خراجِ تحسین پیش کیا۔ اس عظیم کرکٹر کی آخری خواہش تھی کہ ان کے نام سے ایک جدید کرکٹ اکیڈمی قائم کی جائے جو ملک کو نئے حنیف محمد فراہم کر سکے۔