ہانیہ عامر کا پہلا گانا ’پابلو‘ ریلیز، مخالفین کو دوٹوک جواب

کراچی: پاکستان کی معروف اور مقبول ترین اداکارہ ہانیہ عامر نے تمثیل کاری کے بعد موسیقی کی دنیا میں قدم رکھتے ہوئے اپنا پہلا گانا ’پابلو‘ (Pablo) ریلیز کر دیا ہے۔

ہانیہ عامر کا لکھا اور کمپوز کردہ یہ گانا پیانو کی نرم اور دلکش دھن سے شروع ہوتا ہے جو اداکارہ کے شوخ اور معصومانہ انداز سے مطابقت رکھتا ہے، تاہم جلد ہی یہ گانا ایک باقاعدہ پنجابی ہپ ہاپ ٹریک میں تبدیل ہو جاتا ہے۔ گانے کے بولوں میں ہانیہ عامر نے اپنے ناقدین اور ان لوگوں کو کرارا جواب دیا ہے جو ان کی خوبصورتی اور معصومیت کی وجہ سے انہیں ’جعلی‘ سمجھتے ہیں۔

گانے میں اداکارہ اپنی بے پناہ مقبولیت اور ’پنڈی اٹیٹیوڈ‘ کا ذکر کرتے ہوئے بتاتی ہیں کہ ان کی شہرت اور شائقین کا پیار پاکستان سے لے کر پورے بھارت تک پھیلا ہوا ہے۔ ان کا کہنا ہے کہ وہ ناقدین کی باتوں پر دھیان دینے کے بجائے اپنی دھن میں زندگی گزارنے پر یقین رکھتی ہیں اور انٹرویوز نہ دینے کے باوجود خبروں کا مرکز بنی رہتی ہیں۔

گانے کا سب سے دلفریب اور حیران کن حصہ اس کا اختتام ہے جس میں بھارتی ریئلٹی ٹی وی اسٹار راکھی ساونت نے خصوصی اینٹری دی ہے۔ راکھی ساونت نے ہانیہ عامر کو ’جان‘ اور ’حور‘ قرار دیتے ہوئے کہا کہ ان کے چہرے کے نور کی وجہ سے لوگ ان سے حسد کرتے ہیں۔ راکھی ساونت نے پاکستانی اداکارہ کو ’شیرنی‘ قرار دیا اور مشورہ دیا کہ وہ ناقدین کی پروا کیے بغیر آگے بڑھتی رہیں۔