علی حیدرآبادی کیس میں بڑا موڑ: سابقہ اہلیہ کی ظاہر کردہ چوٹیں جعلی نکلیں، ٹک ٹاکر کی ضمانت کنفرم

لاہور: لاہور کی سیشن عدالت نے معروف ٹک ٹاکر علی حیدرآبادی کے خلاف درج مقدمے میں ان کی قبل از گرفتاری ضمانت کی توثیق کرتے ہوئے انہیں بڑا قانونی ریلیف فراہم کر دیا ہے۔ ایڈیشنل سیشن جج نورین انجم نے کیس کی سماعت کی، جہاں علی حیدرآبادی کی جانب سے نامور قانون دان رانا انتظار حسین ایڈووکیٹ پیش ہوئے۔

سماعت کے دوران عدالت میں جمع کرائی گئی سرکاری میڈیکل بورڈ کی رپورٹ نے کیس کا رخ موڑ دیا، جس میں مدعیہ زینب کی جانب سے ظاہر کی گئی چوٹوں اور میڈیکل رپورٹ کو مکمل طور پر جعلی قرار دیا گیا۔ اس رپورٹ کی روشنی میں مقدمے کے بنیادی الزامات اور پولیس شواہد کی درستی پر شدید سوالات اٹھائے گئے۔

• ضمانت کی توثیق: علی حیدرآبادی کے وکیل رانا انتظار حسین نے استدعا کی کہ جعلی شواہد کی بنیاد پر کی جانے والی مدعیت کی کوئی قانونی حیثیت نہیں رہتی، جس کے بعد فریقین کے تفصیلی دلائل سننے پر عدالت نے علی حیدرآبادی کی ضمانت کی توثیق کا حکم جاری کر دیا۔

• جعلی میڈیکل پر قانون کارروائی کا اعلان: فیصلہ آنے کے بعد میڈیا سے گفتگو کرتے ہوئے وکیل رانا انتظار حسین نے اعلان کیا کہ مبینہ طور پر جعلی میڈیکل رپورٹ تیار کروانے اور عدالت کو گمراہ کرنے والے عناصر کے خلاف فوری قانونی کارروائی کا آغاز کیا جائے گا۔

انہوں نے مزید کہا کہ کسی بھی شہری کو جھوٹے اور من گھڑت شواہد کی بنیاد پر ہراساں کرنے کی اجازت نہیں دی جا سکتی اور قانون کے ساتھ کھلواڑ کرنے والوں کو سخت قانونی نتائج کا سامنا کرنا پڑے گا۔ کیس میں آئندہ کی کارروائی میڈیکل بورڈ کے انکشافات کی روشنی میں آگے بڑھے گی۔