27 پی ٹی آئی کی پولیس چھاپوں اور گرفتاریوں کے خلاف لاہور ہائیکورٹ راولپنڈی بنچ میں درخواست دائر

راولپنڈی: پاکستان تحریک انصاف (پی ٹی آئی) نے 27 ستمبر کے مجوزہ مارچ سے قبل پولیس کی جانب سے اپنے رہنماؤں اور کارکنوں کے خلاف بلاجواز چھاپوں اور ہراساں کیے جانے کے اقدامات کے خلاف لاہور ہائیکورٹ راولپنڈی بنچ میں آئینی درخواست دائر کر دی ہے۔

یہ آئینی درخواست پی ٹی آئی راولپنڈی کے جنرل سیکرٹری عاقل خان کی جانب سے دائر کی گئی ہے، جس میں حکومتِ پنجاب، آئی جی پنجاب، آر پی او اور سی پی او راولپنڈی کو فریق بنایا گیا ہے۔درخواست میں موقف اختیار کیا گیا ہے کہ راولپنڈی ڈویژن اور میانوالی سمیت مختلف علاقوں میں پی ٹی آئی کارکنوں اور رہنماؤں کے گھروں پر بغیر کسی قانونی جواز کے چھاپے مارے جا رہے ہیں اور انہیں ہراساں کیا جا رہا ہے۔ درخواست گزار کے مطابق ان پولیس کارروائیوں کا واحد مقصد پی ٹی آئی کے کارکنان کو 27 ستمبر کے احتجاجی مارچ میں شرکت سے روکنا ہے، جو آئینِ پاکستان کے آرٹیکل 14 کی صریح خلاف ورزی ہے۔

درخواست میں عدالت عالیہ سے استدعا کی گئی ہے کہ پی ٹی آئی کارکنوں کے خلاف صرف سیاسی وابستگی کی بنیاد پر چھاپوں، بے جا گرفتاریوں اور ہراسانی کا سلسلہ فوری طور پر روکا جائے، جبکہ پولیس حکام کو گرفتاریوں سے متعلق تصدیق شدہ رپورٹ عدالت میں پیش کرنے کا حکم دیا جائے۔ اس کے علاوہ درخواست گزار نے 27 ستمبر سے قبل عدالت سے فوری عبوری ریلیف فراہم کرنے کی بھی اپیل کی ہے۔