ایران کے خلاف جنگ شروع کرنے کے فیصلے پر کوئی پچھتاوا نہیں: ٹرمپ

واشنگٹن: امریکی صدر ڈونلڈ ٹرمپ نے ایران کے خلاف جنگ کے فیصلے کا دفاع کرتے ہوئے کسی بھی قسم کے پچھتاوے سے انکار کر دیا ہے اور کہا ہے کہ اگر انہیں دوبارہ یہی فیصلہ کرنا پڑا تو وہ ایک بار پھر ایران پر حملے کا انتخاب کریں گے۔

فاکس نیوز کو دیے گئے ایک انٹرویو میں امریکی صدر نے واضح کیا کہ ایران کو کسی بھی صورت میں جوہری ہتھیار حاصل کرنے کی اجازت نہیں دی جا سکتی اور ایران کا ایٹمی پروگرام روکنا ان کی حکومت کی اولین ترجیح ہے۔ انہوں نے دعویٰ کیا کہ اگر امریکا یہ قدم نہ اٹھاتا تو ایران اگلے دو ماہ کے اندر جوہری صلاحیت حاصل کر لیتا۔

ڈونلڈ ٹرمپ کا کہنا تھا کہ اس جنگ کا نومبر میں ہونے والے امریکی وسط مدتی انتخابات پر کوئی منفی اثر نہیں پڑے گا اور یہ فوجی کارروائی انتخابات کے فوراً بعد اپنے اختتام کو پہنچ جائے گی۔ انہوں نے اپنے حامیوں کا دفاع کرتے ہوئے کہا کہ ان کے ووٹرز اس فیصلے سے مایوس نہیں بلکہ اس بات پر فخر محسوس کر رہے ہیں کہ امریکا ایران کے خلاف ایک فیصلہ کن جنگ لڑ رہا ہے۔

امریکی صدر نے مزید دعویٰ کیا کہ ایران کی بحری صلاحیت کو مکمل طور پر نااہل بنا دیا گیا ہے اور ایران اب مشرقِ وسطیٰ کا ’’غنڈہ‘‘ نہیں رہا۔ ان کا کہنا تھا کہ ایران میں کچھ عناصر واشنگٹن میں سیاسی تبدیلی کے منتظر ہیں تاکہ ڈیموکریٹس کے اقتدار میں آنے پر انہیں جوہری پروگرام کے معاملے میں نرمی مل سکے۔

قبل ازیں اپنے بیان کا حوالہ دیتے ہوئے صدر ٹرمپ نے کہا کہ اگر ایران کے پاس پہلے سے ایٹمی ہتھیار موجود ہوتے تو امریکا کو بمباری کرنے کے بجائے ایرانی سپریم لیڈر سے فون پر ان کی منشا پوچھنا پڑتی، تاہم بروقت اقدام نے خطے کا توازن بدل دیا ہے۔