رجب بٹ نے پھر سابق اہلیہ ایمان اسد کو ہتکِ عزت کا قانونی نوٹس بھجوا دیا

معروف پاکستانی ڈیجیٹل کنٹینٹ کری ایٹر رجب بٹ ایک بار پھر اپنی سابقہ اہلیہ ایمان اسد کے ساتھ جاری قانون تنازع کی وجہ سے خبروں کی سرخیوں میں آگئے ہیں۔ یوٹیوب پر 9 ملین، انسٹاگرام پر 3 ملین اور ٹک ٹاک پر 1 ملین کے قریب فالوورز رکھنے والے رجب بٹ نے اپنی سابق اہلیہ کو ہتکِ عزت کا نیا قانونی نوٹس ارسال کر دیا ہے۔

ایمان اسد کے قانون مشیر (وکیل) نے اس پیش رفت کی تصدیق کرتے ہوئے انکشاف کیا ہے کہ رجب بٹ نے نوٹس میں الزام عائد کیا ہے کہ ان کی موکلہ کی جانب سے سوشل میڈیا پر ان کے خلاف ویڈیوز، ریلز اور مبینہ ہتک آمیز کمنٹس کے ذریعے انہیں بدنام کرنے کی منظم کوشش کی جا رہی ہے۔ ذرائع کے مطابق یہ نوٹس ایمان اسد کی سالگرہ کے موقع پر بھجوایا گیا، جس میں ہتکِ عزت کے ساتھ ساتھ بیٹے کی کسٹڈی کا بھی ذکر شامل ہے۔

دوسری جانب ایمان اسد کے وکیل نے ان الزامات کو مسترد کرتے ہوئے کہا ہے کہ قانونی نوٹس کے ساتھ الزامات کا کوئی ٹھوس ثبوت فراہم نہیں کیا گیا۔ انہوں نے بتایا کہ ان کی جانب سے نوٹس کا باضابطہ جواب جمع کرا دیا گیا ہے جس میں رجب بٹ سے الزامات کے شواہد مانگے گئے ہیں تاکہ معاملے کا قانون کے مطابق جائز جائزہ لیا جا سکے۔ وکیل کا مزید کہنا تھا کہ بظاہر یہ اقدام ان کی موکلہ کو ہراساں کرنے اور ذہنی دباؤ میں لانے کی کوشش معلوم ہوتا ہے۔