محسن نقوی سے رابطہ رہتا ہے، تفصیلات نہیں بتائیں گے، بیرسٹر گوہر

اسلام آباد: پاکستان تحریکِ انصاف (پی ٹی آئی) کے چیئرمین بیرسٹر گوہر خان نے وفاقی وزیرِ داخلہ محسن نقوی سے رابطوں کی تصدیق کرتے ہوئے کہا ہے کہ ان سے رابطہ رہتا ہے اور اس سے کبھی انکار نہیں کیا، تاہم ان رابطوں کی تفصیلات عام نہیں کی جائیں گی۔

اسلام آباد میں میڈیا سے گفتگو کرتے ہوئے بیرسٹر گوہر نے واضح کیا کہ سیاسی مسائل کے حل کے لیے ڈائیلاگ بانیِ پی ٹی آئی عمران خان کی بنادی پالیسی ہے، تاہم مذاکرات کس سے، کب اور کن شرائط پر ہوں گے، اس کا تمام تر حتمی فیصلہ صرف عمران خان ہی کریں گے۔ انہوں نے کہا کہ پی ٹی آئی کا کوئی بھی رہنما بانی کی مرضی اور اجازت کے بغیر کوئی قدم نہیں اٹھاتا۔

انہوں نے واضح کیا کہ اس وقت حکومت کے ساتھ نہ تو رسمی مذاکرات ہو رہے ہیں اور نہ ہی کوئی بیک چینل ٹاکس جاری ہیں۔ پی ٹی آئی نے ہمیشہ مذاکرات کے لیے کمیٹیاں تشکیل دیں لیکن حکومت نے کبھی سنجیدگی کا مظاہرہ نہیں کیا اور ہماری لچک کو کمزوری سمجھا گیا۔ قانونی امور اپنی جگہ موجود ہیں مگر درپیش سیاسی بحران کے حل کے لیے جلد از جلد با مقصد اور سنجیدہ مذاکرات شروع ہونے چاہئیں۔ وزیرِ اعظم کی جانب سے بھیجا گیا خط بالآخر پی ٹی آئی قیادت کو موصول ہو گیا ہے اور اس پر مناسب مشاورت کی جا رہی ہے۔