گھروں پر ٹاور لگانے والا بل جاہلانہ اور غاضبانہ ہے: حافظ نعیم الرحمان

لاہور: امیر جماعت اسلامی پاکستان حافظ نعیم الرحمن نے قومی اسمبلی سے پاس ہونے والے نئے ٹیلی کام بل کو سخت تنقید کا نشانہ بناتے ہوئے اسے ‘جاہلانہ اور غاصبانہ’ قرار دیا ہے۔ سماجی رابطے کی ویب سائٹ ‘ایکس’ (سابقہ ٹویٹر) پر جاری اپنے ایک تند و تیز بیان میں حافظ نعیم الرحمن کا کہنا تھا کہ یہ کیسا قانون ہے کہ “گھر ہمارا ہوگا مگر ٹاور ٹیلی کام کمپنی کا لگے گا، اور اگر ایسا نہ کرنے دیا تو شہری کو 5 کروڑ روپے کا بھاری جرمانہ کیا جائے گا”۔ انہوں نے اس بل کو عوام کے بنیادی حقوق پر کھلا ڈاکہ قرار دیا۔

امیر جماعت اسلامی نے پارلیمنٹ کے کردار پر سوال اٹھاتے ہوئے کہا کہ اس بل کی منظوری قومی اسمبلی میں بیٹھے ارکان کی اہلیت اور قابلیت کا شاندار اظہار ہے، جو آئینِ پاکستان سے واضح طور پر متصادم بل پاس کر رہے ہیں۔ حافظ نعیم الرحمن نے زور دے کر کہا کہ نجی مکانات تو دور کی بات ہے، اس قسم کے موبائل ٹاورز کھیل کے میدانوں اور پبلک پارکس میں بھی مقامی کمیونٹی کی مرضی اور اجازت کے بغیر نصب نہیں ہونے چاہئیں۔ انہوں نے حکومت سے سخت سوال کیا کہ کیا عوامی مفادات کے مکمل خلاف ورزی کرنے والے اس بل کی منظوری کے بعد، ملک کی وزیر برائے انفارمیشن ٹیکنالوجی (IT) و ٹیلی کام اور متعلقہ کمیٹی کے سربراہ کو اپنے عہدوں پر برقرار رہنے کا کوئی اخلاقی حق حاصل ہے؟