عظیم انقلابی شاعر حبیب جالب کو دنیا سے رخصت ہوئے 33 برس بیت گئے

عظیم انقلابی شاعر حبیب جالب کو دنیا سے رخصت ہوئے 33 سال گزر گئے۔

حبیب جالب 24 مارچ 1928ء کو مشرقی پنجاب کے شہر ہوشیارپور میں پیدا ہوئے۔ صرف 15 سال کی عمر میں ہی انہوں نے رومانوی شعر کہنے کا آغاز کیا۔ قیام پاکستان کے بعد جالب کراچی منتقل ہوئے اور پھر لاہور آ گئے، جہاں انہوں نے معاشرتی ناانصافیوں کو قریب سے دیکھا اور مزاحمت و احتجاج ان کی شاعری کا بنیادی موضوع بن گیا۔

شاعر نے ہر دور میں قید و بند کی صعوبتیں برداشت کیں، مگر کسی بھی حکمران کے سامنے جھکنے سے انکار کیا۔ انہوں نے فلموں کے لیے بھی مزاحمتی اور رومانوی گیت لکھے جو عوام میں بے حد مقبول ہوئے۔

فیض احمد فیض نے حبیب جالب کو “عوامی شاعر” قرار دیا۔ ان کی مشہور شعری تصانیف میں شامل ہیں: برگ آوارہ، سر مقتل، عہد ستم، ذکر بہتے خون کا، گوشے میں قفس کے، حرف حق، اس شہر خرابی، حرف سردار۔

ساری زندگی فقیری میں گزارنے والے یہ مرد قلندر شاعر 12 مارچ 1993ء کو 65 برس کی عمر میں اس جہان فانی سے رخصت ہوئے۔ حکومت پاکستان نے ان کی وفات کے 16 برس بعد انہیں نشان امتیاز کے اعزاز سے نوازا۔