مومنہ اقبال ہراسگی کیس: تفتیش میں ثاقب چڈھر اور اہلیہ سمیرا بے قصور قرار

سیشن عدالت لاہور میں معروف پاکستانی اداکارہ مومنہ اقبال کو ہراساں کرنے اور جان سے مارنے کی دھمکیاں دینے کے مقدمے میں اہم پیش رفت سامنے آئی ہے۔ این سی سی آئی اے (NCCIA) کے تفتیشی افسر نے مسلم لیگ (ن) کے رکن پنجاب اسمبلی (MPA) ثاقب چڈھر اور ان کی اہلیہ سمیرا کو ابتدائی تفتیش میں بے قصور قرار دیتے ہوئے عدالت کو بتایا کہ دونوں ملزمان کی گرفتاری درکار نہیں۔ تفتیشی رپورٹ کے بعد ایم پی اے نے اپنی عبوری ضمانت واپس لے لی جسے عدالت نے نمٹا دیا۔ دوسری جانب دورانِ سماعت اداکارہ مومنہ اقبال اور ان کے وکیل نے پولیس رپورٹ پر شدید اعتراض اٹھاتے ہوئے مؤقف اختیار کیا کہ مدعیہ کو اعتماد میں لیے بغیر تفتیش تبدیل کی گئی اور تفتیشی افسر نے بغیر مکمل تحقیقات ملزمان کو کلیئر کر دیا۔ وکیل نے عدالت سے تفتیشی عمل کا ازسرِ نو جائزہ لینے کی استدعا کی ہے۔