امریکی اقتصادی پابندیاں: ایران پر شدید معاشی دباؤ، مہنگائی میں ریکارڈ اضافہ

امریکی کی جانب سے عائد کردہ سخت اقتصادی پابندیوں اور بحری راستوں پر ایرانی تیل کی ناکہ بندی کے باعث ایران کو اس وقت تاریخ کے شدید ترین معاشی دباؤ کا سامنا ہے۔ ایرانی حکام کے مطابق ان پابندیوں نے ملک کی خلیجی و بین الاقوامی سطح پر تیل کی برآمدات اور بیرونی مالیاتی ذرائع تک رسائی کو مکمل طور پر مفلوج کر کے رکھ دیا ہے۔ جس کے نتیجے میں ایرانی کرنسی (ریال) کی قدر تاریخ کی ریکارڈ کم ترین سطح پر گر چکی ہے جبکہ ملک میں افراطِ زر اور مہنگائی کی شرح میں بھی متواتر شدید اضافہ دیکھا جا رہا ہے۔ ذرائع نے انکشاف کیا ہے کہ جاری جنگی صورتحال اور ناکہ بندی کے باعث ایران کے پاس اندرونی استعمال کے لیے صرف دو ماہ کا پٹرولیم ذخیرہ باقی بچا ہے، جس سے ملک میں توانائی کے بحران کا خطرناک اندیشہ پیدا ہو چکا ہے۔