اسرائیلی انتہا پسند وزیر کا غزہ سے فلسطینیوں کی بیرون ملک منتقلی کا منصوبہ پیش

اسرائیل کے انتہا پسند قومی سلامتی کے وزیر اتمار بن گویر نے غاصبانہ پالیسیوں کو آگے بڑھاتے ہوئے غزہ کی پٹی سے تمام فلسطینیوں کو بیرونِ ملک منتقل کرنے کا نیا اور انتہائی متنازع منصوبہ پیش کر دیا ہے۔ اپنے ایک بیان میں بن گویر نے تفصیلات بتاتے ہوئے کہا کہ ان کے پلان کے مطابق پہلے سال کے دوران اڑھائی لاکھ (250,000) فلسطینیوں کو غزہ کی سرحدوں سے باہر بھیجا جائے گا، جبکہ آئندہ چھ برس کے عرصے میں غزہ کی تقریباً تمام یعنی 20 لاکھ سے زائد آبادی کو مکمل طور پر منتقل کرنے کا ہدف طے کیا گیا ہے۔ اسرائیلی انتہا پسند وزیر نے یہ بے بنیاد دعویٰ بھی کیا کہ دنیا کے کچھ ممالک ان فلسطینیوں کو اپنے ہاں پناہ دینے اور قبول کرنے کے لیے تیار ہیں، تاہم انہوں نے اس دعوے کے حق میں کسی بھی ملک کا نام بتانے سے گریز کیا۔