روس کے کیف پر تازہ حملے میں بچے سمیت 10 افراد زخمی

یوکرین کے دارالحکومت کیف پر روس کے تازہ فضائی حملے کے نتیجے میں ایک بچے اور طبی عملے کے چھ ارکان سمیت 10 افراد زخمی ہو گئے ہیں۔ مقامی حکام کے مطابق روسی ڈرون یا میزائل حملے سے کیف میں واقع ایک بلند عمارت کو شدید نقصان پہنچا، جس کے بعد عمارت کی نویں منزل پر خوفناک آگ بھڑک اٹھی۔ ریسکیو ٹیموں نے فوری کارروائی کرتے ہوئے عمارت سے 15 افراد کو محفوظ مقام پر منتقل کیا۔ کیف کے میئر نے تصدیق کی ہے کہ زخمیوں میں طبی عملے کے 6 اہلکار بھی شامل ہیں جو امدادی سرگرمیوں کے دوران متاثر ہوئے۔ ابتدائی طور پر حملے میں ایک شخص کی ہلاکت کی اطلاع دی گئی تھی، تاہم بعد میں انتظامیہ نے اس کی تردید کر دی۔ واضح رہے کہ کیف میں گزشتہ ایک ہفتے سے زائد عرصے سے روس کی جانب سے شدید اور مسلسل حملوں کا سلسلہ جاری ہے۔