کوڈ آف کنڈکٹ کی خلاف ورزی پر گل فیروزہ پر جرمانہ عائد

ویمن ایشیا کپ کے دوران ہانگ کانگ کے خلاف کھیلے گئے میچ میں پاکستان ویمن کرکٹ ٹیم کی بیٹر گل فیروزہ کو ضابطہ اخلاق (کوڈ آف کنڈکٹ) کی خلاف ورزی پر جرمانہ عائد کر دیا گیا ہے۔ انٹرنیشنل کرکٹ کونسل (آئی سی سی) کے مطابق گل فیروزہ نے آئی سی سی کوڈ آف کنڈکٹ کے آرٹیکل 2.8 کی خلاف ورزی کی ہے، جو میچ کے دوران امپائر کے فیصلے سے اختلاف کا اظہار کرنے سے متعلق ہے۔

میچ کے دوران امپائر کی جانب سے آؤٹ دیے جانے کے بعد گل فیروزہ نے امپائر کے فیصلے پر ناراضی ظاہر کرتے ہوئے بیٹ کے ساتھ گیند لگنے کا اشارہ کیا تھا، جسے غیر ذمے دارانہ رویہ قرار دیا گیا۔ آئی سی سی نے ایکشن لیتے ہوئے ضابطہ اخلاق کی اس خلاف ورزی پر گل فیروزہ پر ان کی میچ فیس کا 10 فیصد جرمانہ عائد کیا ہے، جبکہ ان کے ڈسپلنری ریکارڈ میں ایک ڈی میرٹ پوائنٹ کا بھی اضافہ کر دیا گیا ہے۔