سنچری مکمل نہ کرنے کا افسوس ہوتا ہے، پلان تھا میچ فنش کرکے آؤں: گل فیروزہ

پاکستان ویمن کرکٹ ٹیم کی اوپنر گل فیروزہ نے اپنے حالیہ انٹرویو میں کہا ہے کہ انہیں سنچری مکمل نہ کر پانے کا افسوس ہے کیونکہ ان کا اصل منصوبہ یہ تھا کہ وہ خود میچ فنش کر کے ناٹ آؤٹ واپس آئیں۔ پی سی بی ڈیجیٹل سے گفتگو کرتے ہوئے انہوں نے آئندہ میچز کے لیے بھی بہترین کارکردگی کا مظاہرہ کرنے کا عزم ظاہر کیا۔

گل فیروزہ نے میچ میں شاندار بیٹنگ کر کے ‘پلیئر آف دی میچ’ کا ایوارڈ حاصل کرنے پر خوشی کا اظہار کرتے ہوئے کہا کہ وہ کریز پر رنز بنانے کے لیے بہت پُراعتماد تھیں اور انہیں اس بات کی بے حد خوشی ہے کہ وہ ٹیم کی فتح میں اہم کردار ادا کر سکیں۔ انہوں نے پاکستانی باؤلرز کی تعریف کرتے ہوئے کہا کہ باؤلنگ لائن نے بہترین کم بیک کیا اور سری لنکن ویمن ٹیم کو بڑا اسکور بنانے کا موقع نہیں دیا۔

بیٹنگ کی حکمت عملی پر بات کرتے ہوئے اوپنر کا کہنا تھا کہ پارٹنرشپ قائم کرنے کے لیے پلان بالکل سادہ تھا کہ گیند کو اس کی میرٹ پر کھیلا جائے۔ ان کا کہنا تھا کہ ٹیم مینجمنٹ کے ساتھ فیصلہ ہوا تھا کہ وہ اٹیکنگ اندازِ کھیل جاری رکھیں گی۔

انہوں نے سیریز میں شاندار آغاز کو خوش آئند قرار دیتے ہوئے کہا کہ پہلے میچ میں کامیابی سے ٹیم کا حوصلہ بلند ہوا ہے اور وہ آئندہ بھی مثبت سوچ کے ساتھ میدان میں اتریں گی۔ گل فیروزہ نے مزید کہا کہ آئی سی سی ویمن چیمپئن شپ کا حصہ اس سیریز کو تین صفر سے جیتنا ان کا بنیادی ہدف ہے۔