گوئٹے مالا: لوڈو کے طرز کا قدیم پُراسرار کھیل دریافت

ماہرینِ آثارِ قدیمہ نے گوئٹے مالا میں واقع قدیم ماین تہذیب کے شہر ناچٹن سے موزیک اسٹائل میں تیار کیے گئے ایک منفرد اور نایاب بورڈ گیم کی باقیات دریافت کر لی ہیں، جو قدیم تہذیبوں کے تفریحی اور ثقافتی پہلوؤں پر نئی روشنی ڈالتی ہیں۔

ماہرین کے مطابق یہ بورڈ گیم پیٹولی کہلاتا ہے، جو لوڈو سے مشابہ ایک قدیم کھیل تھا اور جنوبی و شمالی امریکا میں ایزٹک اور ابتدائی میسو امیریکن ثقافتوں میں مقبول رہا۔ تاریخی شواہد کے مطابق اس کھیل میں جوا بھی شامل ہوتا تھا، جس سے اس کی سماجی اہمیت کا اندازہ لگایا جا سکتا ہے۔

پیٹولی گیم میں عام طور پر کراس کی شکل میں 52 خانے ہوتے تھے، جو کپڑے یا زمین پر بنائے جاتے تھے۔ اس کھیل میں پیٹول بینز استعمال کی جاتی تھیں، جن کی ایک جانب نقطہ بنا ہوتا تھا اور انہیں پانسوں کی طرح پھینکا جاتا تھا۔

ماہرین کا کہنا ہے کہ اگرچہ پیٹولی ایزٹک تہذیب میں بخوبی دستاویزی شکل میں موجود ہے، تاہم ماین معاشروں میں یہ کھیل کس طرح کھیلا جاتا تھا، اس بارے میں ابھی مکمل معلومات دستیاب نہیں ہو سکیں۔ ناچٹن سے ملنے والی یہ دریافت ماین تہذیب کی روزمرہ زندگی، تفریح اور سماجی سرگرمیوں کو سمجھنے میں اہم پیش رفت قرار دی جا رہی ہے۔

ماہرین امید ظاہر کر رہے ہیں کہ مزید تحقیق سے اس قدیم کھیل کے قواعد اور ماین معاشرے میں اس کے کردار سے متعلق مزید حقائق سامنے آئیں گے۔