دنیا کی تیز ترین لفٹ: چند لمحوں میں سینکڑوں میٹر کی بلندی طے، نیا ریکارڈ قائم

گوانگژو: چین کے شہر گوانگژو میں ایک انتہائی تیز لفٹ نے عالمی سطح پر نیا ریکارڈ قائم کر دیا ہے۔ گنیز ورلڈ ریکارڈ کے مطابق یہ لفٹ اب دنیا کی سب سے تیز رفتار لفٹ کے طور پر تسلیم کی گئی ہے۔

یہ لفٹ سی ٹی ایف فنانس سینٹر میں نصب کی گئی ہے اور جدید ٹیکنالوجی اور اعلیٰ حفاظتی نظام کی بدولت مسافروں کو چند سیکنڈوں میں عمارت کی بڑی بلندی تک پہنچانے کی صلاحیت رکھتی ہے۔

لفٹ کی رفتار تقریباً 1,260 میٹر فی منٹ ہے، یعنی یہ 76 کلومیٹر فی گھنٹہ کی رفتار سے اوپر یا نیچے حرکت کر سکتی ہے، جو عام لفٹوں کے مقابلے میں بے پناہ تیز ہے۔ یہ مسافروں کو تقریباً 440 میٹر کی بلندی پر چند لمحوں میں پہنچا دیتی ہے۔

اتنی تیز رفتاری کے باوجود، دباؤ متوازن کرنے والے نظام، جدید موٹر اور ہوا کے دباؤ کو کنٹرول کرنے والی ٹیکنالوجی کے ذریعے سفر بالکل آرام دہ اور محفوظ بنایا گیا ہے۔

ماہرین کا کہنا ہے کہ بلند عمارتوں کی بڑھتی تعداد کے ساتھ مستقبل میں ایسی تیز اور محفوظ لفٹس کی اہمیت مزید بڑھ جائے گی۔