25 سال سے ویران ائیرپورٹ کو ایک مکمل شہر میں تبدیل کر دیا گیا

یونان کے دارالحکومت ایتھنز میں 2001 سے ویران پڑے ‘ایلینیکون’ (Ellinikon) ائیرپورٹ کو ایک جدید اور پرتعیش ساحلی شہر میں تبدیل کرنے کا کام تیزی سے جاری ہے، جسے یورپ کا سب سے بڑا شہری ترقیاتی منصوبہ قرار دیا جا رہا ہے۔ تقریباً 7.6 ارب برطانوی پاؤنڈز کی خطیر لاگت سے تیار ہونے والے اس منصوبے کے تحت، سابقہ ائیرپورٹ اب ‘پرومنیڈ ہائٹس’ (Promenade Heights) کے نام سے ایک مکمل شہر کی شکل اختیار کر رہا ہے، جس کا رقبہ یورپی ملک موناکو سے تین گنا زیادہ ہوگا۔ اس میگا پراجیکٹ میں 9 بلند و بالا اپارٹمنٹ بلاکس تعمیر کیے جا رہے ہیں، جن کی تکمیل 2027 کے آغاز تک متوقع ہے۔

اس نئے شہر کی خاص بات یہاں تعمیر ہونے والا ‘ریویریا ٹاور’ ہے، جو مکمل ہونے پر یونان کی بلند ترین عمارت کا اعزاز حاصل کر لے گا۔ ماہرینِ تعمیرات کے مطابق، اس شہر کو ’15 منٹ سٹی’ کے تصور پر ڈیزائن کیا گیا ہے، جہاں رہائشی اپنی تمام تر ضروریات کے لیے کسی بھی جگہ محض 15 منٹ پیدل چل کر پہنچ سکیں گے۔ کسی زمانے میں سالانہ ایک کروڑ مسافروں کی میزبانی کرنے والا یہ ائیرپورٹ اب عالمی سطح پر رئیل اسٹیٹ اور سیاحت کا نیا مرکز بننے جا رہا ہے، جو جدید طرزِ زندگی اور ساحلی خوبصورتی کا حسین امتزاج ہوگا۔