سونے کی عالمی و مقامی سطح پر قیمتوں میں بڑی کمی

کراچی: سونے کی عالمی اور مقامی سطح پر چار روز کے وقفے کے بعد بڑی کمی ریکارڈ کی گئی ہے۔ عالمی منڈی میں سونے کی قیمت میں فی اونس 214 ڈالر کی کمی دیکھنے میں آئی اور یہ 4,850 ڈالر فی اونس کی سطح پر آگئی۔

ملک بھر کی صرافہ مارکیٹوں میں 24 قیراط کے حامل فی تولہ سونے کی قیمت بھی 21,400 روپے کی کمی کے بعد 507,762 روپے کی سطح پر آگئی۔ اسی طرح فی 10 گرام سونے کی قیمت میں 18,347 روپے کی کمی ہوئی اور یہ 435,324 روپے پر ٹریڈ کر رہا ہے۔

چاندی کی قیمتوں میں بھی نمایاں کمی دیکھی گئی، جہاں فی تولہ چاندی کی قیمت 1,430 روپے کم ہو کر 7,825 روپے کی سطح پر آگئی، جبکہ فی 10 گرام چاندی کی قیمت 1,226 روپے کی کمی کے بعد 6,708 روپے پر پہنچ گئی۔

ماہرین کے مطابق عالمی منڈی میں سونے کی قیمتوں میں کمی اور مقامی سطح پر روپے کی قدر میں استحکام اس کمی کی اہم وجہ ہے۔