پاکستان میں موسمیاتی تبدیلی سے متاثرہ آبادی پر ڈیٹا کا فقدان ہے، جرمن ماہر

ممتاز جرمن ماہر ڈاکٹر یان فرایئہارٹ نے خبردار کیا ہے کہ پاکستان میں قیمتی زرعی اراضی تیزی سے دریا برد ہو رہی ہے، جس کے سماجی و معاشی اثرات سے نمٹنے کے لیے ہنگامی بنیادوں پر تحقیق کی ضرورت ہے۔ جامعہ کراچی کے بین الاقوامی مرکز برائے کیمیائی و حیاتیاتی علوم (آئی سی سی بی ایس) میں یونیسکو چیئر کے تحت منعقدہ ایک خصوصی لیکچر میں انہوں نے بنگلہ دیش میں ماحولیاتی شدت اور انسانی نقل مکانی پر اپنی طویل تحقیق کے نتائج پیش کیے۔ ای ٹی ایچ زیورخ سے وابستہ ڈاکٹر یان کا کہنا تھا کہ بنگلہ دیش اور پاکستان دونوں کو یکساں چیلنجز کا سامنا ہے، جہاں طویل دریائی اراضی سیلاب کی وجہ سے کٹاؤ کا شکار ہے اور موسمیاتی تبدیلیاں بڑے پیمانے پر آبادی کی نقل مکانی کا سبب بن رہی ہیں۔

ڈاکٹر یان فرایئہارٹ نے اپنی تحقیق کو سادہ انداز میں پیش کرتے ہوئے شرکا کو بتایا کہ کئی برسوں کے سروے سے یہ ثابت ہوا ہے کہ دریائی کٹاؤ محض جغرافیائی تبدیلی نہیں بلکہ ایک انسانی بحران ہے، جو زرعی اراضی کے خاتمے کے ساتھ ساتھ غربت میں اضافے کا باعث بنتا ہے۔ انہوں نے اس بات پر زور دیا کہ بنگلہ دیش میں کی گئی تحقیق پاکستان کے لیے دو طرح سے مفید ہو سکتی ہے: اول، یہ دریائی کٹاؤ کی سائنسی وجوہات کو سمجھنے میں مدد دے گی، اور دوم، یہ موسمیاتی تبدیلیوں کے نتیجے میں بے گھر ہونے والے افراد کی آباد کاری کے لیے پالیسی سازی میں معاون ثابت ہوگی۔ ماہرین نے اس لیکچر کو پاکستان میں ماحولیاتی تحفظ اور وسائل کے انتظام کے حوالے سے ایک اہم سنگِ میل قرار دیا ہے۔