امریکا ایران امن معاہدے کی توقع؛ خام تیل کی عالمی قیمتوں میں بڑی کمی

امریکا اور ایران کے درمیان ممکنہ امن معاہدے کی خبروں کے بعد عالمی منڈی میں خام تیل کی قیمتیں مسلسل نیچے آنے لگیں اور دو ہفتوں کی کم ترین سطح پر پہنچ گئیں۔

عالمی میڈیا رپورٹس کے مطابق خام تیل کی عالمی قیمتوں میں تقریباً پانچ فیصد کمی دیکھی گئی ہے جس کے بعد مختلف بین الاقوامی مارکیٹوں میں تیل کی خرید و فروخت دباؤ کا شکار رہی۔

برطانوی خام تیل کی فی بیرل قیمت میں پانچ ڈالر سے زائد کمی ہوئی جبکہ امریکی خام تیل کی قیمت میں بھی نمایاں گراوٹ ریکارڈ کی گئی۔

ماہرین کا کہنا ہے کہ اگر آبنائے ہرمز دوبارہ مکمل طور پر کھل جاتی ہے اور تیل کی ترسیل معمول پر آ جاتی ہے تو عالمی منڈی میں قیمتوں میں مزید کمی متوقع ہے۔

امریکی صدر کے بیان کے بعد سرمایہ کاروں نے یہ امید ظاہر کی ہے کہ مشرقِ وسطیٰ میں کشیدگی میں کمی آئے گی جس سے توانائی کی عالمی منڈی کو استحکام مل سکتا ہے۔

دوسری جانب توانائی تجزیہ کاروں نے خبردار کیا ہے کہ تیل و گیس کی تنصیبات کو پہنچنے والے نقصانات اور محدود سپلائی کے باعث مارکیٹ پر دباؤ تاحال برقرار ہے۔

شپنگ اعداد و شمار کے مطابق مائع گیس سے بھرے جہاز آبنائے ہرمز سے گزر کر پاکستان اور چین کی جانب روانہ ہو چکے ہیں جبکہ عراقی خام تیل سے بھرا ایک بڑا بحری جہاز بھی کئی ماہ بعد خلیج سے روانہ ہوا ہے۔