واٹس ایپ کی جانب سے ایک نیا یوزر نیم فیچر متعارف کرانے کی تیاری کی جا رہی ہے جس کے بعد صارفین ایک دوسرے سے فون نمبر شیئر کیے بغیر رابطہ کر سکیں گے۔

اس فیچر کے تحت ہر صارف اپنا منفرد یوزر نیم بنا سکے گا، بالکل انسٹاگرام کی طرز پر، اور جب کوئی صارف کسی سے رابطہ کرے گا تو سامنے فون نمبر کی بجائے صرف یوزر نیم ظاہر ہوگا۔

یہ فیچر اختیاری ہوگا، یعنی صارفین چاہیں تو واٹس ایپ کو پہلے کی طرح فون نمبر کے ساتھ بھی استعمال کر سکیں گے۔ تاہم اس نئے سسٹم میں ہر اکاؤنٹ کو ایک یوزر نیم بنانے کی اجازت ہوگی جو چیٹس اور اکاؤنٹ سیٹنگز کو متاثر نہیں کرے گا۔

تفصیلات کے مطابق فون نمبر اکاؤنٹ سے منسلک رہے گا لیکن اسے صرف لاگ ان اور ریکوری کے لیے استعمال کیا جائے گا، جبکہ دیگر صارفین کو یہ نظر نہیں آئے گا۔

فیچر کے تحت صارف کو سیٹنگز میں جا کر پروفائل سیکشن سے یوزر نیم منتخب کرنا ہوگا، اور یہ یوزر نیم 3 سے 35 حروف پر مشتمل ہو سکے گا۔

یہ فیچر اس وقت محدود صارفین کے لیے دستیاب ہے تاہم امکان ظاہر کیا جا رہا ہے کہ اسے جون 2026 میں بڑے پیمانے پر متعارف کرایا جا سکتا ہے۔