آسٹریلیا: چور مہاتما گاندھی کا مجسمہ لے اُڑے، پاؤں چھوڑ گئے

میلبرن: آسٹریلیا کے شہر میلبرن میں واقع آؤسٹریلین انڈین کمیونٹی سینٹر کے باہر نصب مہاتما گاندھی کا 420 کلوگرام وزنی کانسی کا مجسمہ چوری ہو گیا، جس پر بھارتی کمیونٹی میں شدید تشویش اور غم و غصے کا اظہار کیا جا رہا ہے۔

پولیس کے مطابق یہ واقعہ پیر اور منگل کی درمیانی شب تقریباً 12 بج کر 50 منٹ پر پیش آیا، جب تین نامعلوم افراد نے اینگل گرائنڈر کی مدد سے مجسمے کو اس کی بنیاد سے کاٹ کر چوری کر لیا۔ سوشل میڈیا پر وائرل تصاویر میں مجسمے کے صرف پاؤں باقی دکھائی دے رہے ہیں۔

یہ مجسمہ انڈین کونسل فار کلچرل ریلیشنز (ICCR)، نئی دہلی کی جانب سے تحفے کے طور پر دیا گیا تھا، جس کی بھارتی کمیونٹی کے لیے تاریخی، ثقافتی اور علامتی اہمیت تھی۔ مجسمے کا افتتاح 12 نومبر 2021 کو اس وقت کے آسٹریلوی وزیرِاعظم اسکاٹ موریسن نے کیا تھا۔

ویکٹوریہ پولیس کے نکس کرائم انویسٹیگیشن یونٹ نے واقعے کی تحقیقات شروع کر دی ہیں جبکہ مقامی اسکریپ میٹل فروشوں کو بھی خبردار کیا گیا ہے کہ کسی بھی مشتبہ سرگرمی کی فوری اطلاع پولیس کو دی جائے۔

آؤسٹریلین انڈین کمیونٹی چیریٹیبل ٹرسٹ کے کمیٹی رکن سنتوش کمار کے مطابق چوری کا واقعہ جزوی طور پر سی سی ٹی وی کیمروں میں ریکارڈ ہوا ہے اور اگلے روز پولیس کو رپورٹ کیا گیا۔

پولیس اور کمیونٹی رہنماؤں کا کہنا ہے کہ اس واقعے کو بھارت مخالف بڑھتے ہوئے جذبات سے بھی جوڑا جا رہا ہے، جو حالیہ عرصے میں خالصتان سے منسلک انتہا پسند عناصر کی جانب سے بھارتی سفارتی مشنز اور کمیونٹی مراکز پر حملوں کے بعد نمایاں ہوئے ہیں۔