فرنچ اوپن ٹورنامنٹ کی مینجمنٹ نے کتے کو ایکریڈیٹیشن کارڈ جاری کر دیا

ٹینس کے معتبر ترین گرینڈ سلیم ٹورنامنٹ ‘فرنچ اوپن’ میں ایک انوکھا اور تاریخی واقعہ پیش آیا ہے، جہاں ٹورنامنٹ کی انتظامیہ نے تاریخ میں پہلی بار کسی کتے کو باقاعدہ آفیشل ایکریڈیٹیشن کارڈ جاری کر دیا ہے۔ یہ کارڈ دنیا کی مایہ ناز ٹینس اسٹار اور عالمی نمبر ون ارینا سبالینکا کے پالتو کتے ’ایش‘ (Ash) کو جاری کیا گیا ہے۔ اس غیر معمولی فیصلے کے بعد ’ایش‘ کلے کورٹ (Clay Court) کے اس تاریخی ٹورنامنٹ کی تاریخ میں آفیشل ایکریڈیٹیشن حاصل کرنے والا پہلا پالتو جانور بن گیا ہے، جس کی تصاویر انٹرنیٹ پر وائرل ہو چکی ہیں۔

رپورٹس کے مطابق، ’ایش‘ اب اپنے اس خصوصی ایکریڈیٹیشن کارڈ کے ساتھ نہ صرف ٹورنامنٹ کے تمام ممنوعہ علاقوں میں جا سکتا ہے بلکہ وہ پریکٹس سیشنز سمیت پیرس میں ہونے والی تمام دیگر اہم سرگرمیوں میں بھی ارینا سبالینکا کے ساتھ سائے کی طرح موجود رہتا ہے۔ فرنچ اوپن مینجمنٹ کے اس حیران کن اور دلچسپ اقدام کے سوشل میڈیا پر خوب چرچے ہو رہے ہیں، جہاں ٹینس کے مداح اور سوشل میڈیا صارفین کتے کو کارڈ جاری کیے جانے پر کہیں حیرانی کا اظہار کر رہے ہیں تو کہیں اسپورٹس انتظامیہ کے اس دوستانہ اور اچھوتے رویے کو شدید سراہ رہے ہیں۔