روس میں آسمان پر ’چار چاند‘ لگ گئے!

روس کے شہر سینٹ پیٹرزبرگ میں اتوار کی رات آسمان پر ایک ساتھ چار چاند چمکتے دیکھ کر مقامی افراد حیران و ششدر رہ گئے۔ نایاب اور دلکش منظر دیکھتے ہی شہری رک گئے اور دیر تک آسمان کی جانب دیکھتے رہے، جبکہ اس کی تصاویر اور ویڈیوز سوشل میڈیا پر تیزی سے وائرل ہو گئیں۔

وائرل ویڈیوز میں بظاہر ایسا محسوس ہوتا ہے جیسے چاند نے خود کو کئی حصوں میں تقسیم کر لیا ہو، کیونکہ اصل چاند کے اردگرد روشن اور چمکتی ہوئی شکلیں واضح طور پر دکھائی دے رہی تھیں۔ آسمان کے نظاروں کے شوقین افراد کے لیے یہ منظر نہایت حیرت انگیز اور یادگار ثابت ہوا۔

آخر یہ “چار چاند” کیسے نظر آئے؟

ماہرین کے مطابق یہ کوئی خلائی یا غیر معمولی فلکیاتی واقعہ نہیں بلکہ ایک قدرتی مظہر ہے جسے پیرسیلینی (Paraselenae) کہا جاتا ہے۔ عام زبان میں اسے مون ڈاگ (Moon Dog) یا نقلی چاند بھی کہا جاتا ہے۔

یہ مظہر دراصل موسم سے جڑا ایک آپٹیکل الیوژن (Optical Illusion) ہے، جو اس وقت بنتا ہے جب فضا میں موجود برف کے باریک کرسٹل چاندنی کو مخصوص زاویوں سے منعکس کرتے ہیں۔ اسی انعکاس کے باعث اصل چاند کے اطراف ایک یا ایک سے زائد روشن دھبے نظر آتے ہیں، جو دیکھنے میں اضافی چاند محسوس ہوتے ہیں۔

ماہرین کا کہنا ہے کہ یہ مظہر سرد علاقوں میں نسبتاً زیادہ دیکھا جاتا ہے اور اگرچہ نایاب ہے، مگر قدرتی طور پر بالکل بے ضرر اور خوبصورت نظارہ ہوتا ہے۔