پاکستان کرکٹ کو تباہ کردیا، سابق کرکٹرز کی پی سی بی کے فیصلے پر کڑی تنقید

انگلینڈ کے خلاف ابتدائی دو ٹیسٹ میچز میں ناکامی کے بعد دورانِ سیریز قومی اسکواڈ سے سات کھلاڑیوں اور کوچنگ اسٹاف کو فارغ کر کے وطن واپس بھیجنے کے پی سی بی کے فیصلے پر سابق کرکٹرز نے شدید برہمی کا اظہار کیا ہے۔ سابق کپتان شاہد آفریدی نے اس فیصلے اور متبادل کھلاڑیوں کے انتخاب کو سمجھ سے بالاتر قرار دیتے ہوئے سوال اٹھایا کہ محض 5 ٹیسٹ میچز کے بعد کوچ کو ہٹانا اور ٹیسٹ میں ٹی ٹوئنٹی کے کھلاڑیوں کو شامل کرنا کیسی سوچ ہے؟ دوسری جانب شعیب ملک نے کھلاڑیوں کے لیے “پہلی فلائٹ سے واپس بھیجنے” کے جملے کو توہین آمیز قرار دیتے ہوئے کہا کہ احتساب کا آغاز کھلاڑیوں کی بجائے نظام خراب کرنے والوں سے ہونا چاہیے اور یہ عمل دورے کے اختتام پر کیا جانا چاہیے تھا۔ سابق کرکٹر تنویر احمد نے بھی سخت الفاظ میں تنقید کرتے ہوئے کہا کہ اس طرزِ عمل سے کرکٹ کی عزت کو مجروح کیا گیا ہے۔